JULY SHATA (26) YA

SAN PRA AI JOAKIM HTE ANNA

( NU MARIA A KANU YAN KAWA)

San Pra ai Joakim hte Anna hpe Nu Maria a kanu yan kawa hku nna Nawku Hpung hkungga shagrau ai. Ndai San pra ai yan a lam hpe Nawku Hpung matsun maroi ga ni hku nna chye lu ai. Tsa ban lahkawng na Yaku a shingran laika hta Maria  shangai chying hkai wa ai lam hpe tsun da nga ai. San Pra ai Joakim hte Anna gaw, Nazaret mare hta nga nna, kashu kasha n lu ai majaw masha ni e ginhka da hkrum ai yan rai nga ai. Dai rai nna, shan gaw nhtoi mali shi ya lu sha gam nhtawm, akyu hpyi shaja ai shaloi, Lamu Kasa dan pru nna kashu kasha lu na re, ngu nna nga nna shana ya ai. Nu Maria gaw San pra ai Joakim yan Anna a yawn hkyen myi prwi hte lu sha gam akyu hpyi ai magam a apu asi rai nga ai. Teng ai lam tsun ga nga jang, Anna gaw Karai Kasang laklai garum ya ai majaw, asak kaba aten lai mat ai hpang, Chyoi Pra ai Maria hpe shangai chying hkai la lu sai rai nga ai. Dai gaw, Elizabeth Yawhan Baptista hpe asak kaba mat ai hpang shangai chyinhkai lu la ai hte, Samuela a kanu gaw asak aprat kaba aten lai mat ai hpang   Samuela hpe shangai chying hkai la lu ai lam hte grai bung ai (1Sam 1; Lk.1:11-24). Hkaw seng Justinian (1) gaw, shaning 550 hta Constantinople kaw San Anna yan Joakim hpe hkungga shagrau ai hku nna, shawng nnan na Nawku Jawng hpe gaw gap da sai. Tsa ban 6 hta sinna mungdan maga de ndai San Pra ai yan hpe hkungga shakawn shagrau ai lam Venice mare hte kaga shara law law hta  mu lu nga ai. Labau laika ni hte sawk sagawn ai lam ni n lawm tim, Anna yan Joakim gaw hkye hkrang la ai magam kaba hta grai ahkyak ai hku shang lawm ai, Maria hpe shangai shaprat ya ai yen rai nga ai. Maria hpe Chyoipra san seng myitsu kangka hkra,  kawn kaba sharin shaga dat ai chying hkai kanu yen kawa rai nga ma ai lam grai dan leng nga ai. Joakim hte Anna gaw Hkristan kanu kawa ni a matu kasi kaman kaja nan rai nna,  kashu kasha hpe pawn ba sharin shaga ai lam hta Hkristan nga sat nga sa lam hpe katsi kaja madun, sharin shaga ya  nga ai.

Sumru yu mai ai lam: Maria, Karai Kasang a ga hpe kalang lata hkap madat la lu ai lam,  Karai a Mungga hpe Maria sung sung chye madat da ai lam, Mawshe a tara hte htung hking makam masham hpe aja awa jum tek da chye ai lam, Shi a jinghku jingyu ni hte matut mahkai htep lahti nga ai lam ni gaw shi a kanu yan kawa a kraw dung lai len (nature) arawn alai ni kaw nna dagraw la lu ai lam rai nga ai. San pra ai Joakim yan Anna gaw shan a tsawra daw jau ai amu magam a marang e, shan a kasha hpe chyoi pra ai prat de woi sa wa lu sai. Dai majaw, shan gaw Hkristan kanu kawa ni hpe makawp maga ai, katsi la mai ai San Pra ai yan re, ngu nna hkungga lara shagrau shakawn mai nga ai. Anhte Mungdan hta shan hpe hkungga shagrau ai hku nna kanu kawa poi hpe July shata 26 ya shani hta galaw ma ai.

Chyum Mungga: “Na  nnu yan nwa hpe hkungga lara di u,” dai gaw shawng nnan na tara kanu rai nga ai. Ma ni e, nanhte a kanu yan kawa hpe dai Madu hta madat mara nga mu: dai gaw ging dan ai lam rai nga ai. Nang ngamu ngamai ai hkrum nna, na a nhtoi gaw dai mungdan hta galu kaba nga lit ga, na nnu yan nwa hpe hkungga lara di u, nga nna htet da ai ga gaw, ga ndat lawm ai, shawng na htet da ai ga rai nga ai (Ehp. 6:1-3).

La kap laika:   “Saints for everyday,” Fr. Antony Netikat CM (2011)