Mother Mary

Ga Shaka Ningnan hta mung hkye hkrang la ai magam bungli hpe gun hpai na matu Karai Kasang shaga la nna shangun dat ai ni rai nga ai.  Chyoi pra ai Maria hpe Karai a Kanu tai na matu shi hpe Karai Kasang shaga la ai. Chyoi Pra ai Maria gaw, Karai Kasang hpe kam sham shamyet shanat ai jan rai nna, shi a myit hta ung ang ai lam n nga ai sha Karai Kasang, shi hpe shaga la ai hpe kamsham ai hte hkap la sai. Dai aten kaw nna hkye hkrang la ai magam byin tai wa sai. “Yu u Madu a mayam jan ngai rai li ai; na ga hte maren ngai hta byin wa u ga” (Lk 1:38).

Adam yan Ewa, shut hpyit mara galaw ai hpang, Karai Kasang gaw shinggyim masha hpe n kaja ai tsin-yam, tsindam hta sha, kabai kau da ai n rai. “Anhte gaw tsawra ai myit hte, shi a man e chyoi pra ai ni hte mara n rawng ai ni tai wa u ga, ginding aga garai n lat yang kaw nna, shi anhte hpe Hkristu hta e, lata la mani ai” (Ehp. 1:4), nga ai hte maren, shi gaw, mara n kap, san seng san pra ai Maria hpe, tsawra myit hte mada yu nna masha hpe hkye hkrang la ai wa a kanu tai na matu shaga la sai.

Yesu Madu gaw, mungkan masha ni hpe hkye la na matu Kawa Karai Kasang shangun dat ai, Shi tsawra ai kasha rai nga nna (Yn.3:16-17), Kawa matsun madun ai hte maren hkan sa shadik shatup sai (Yn.5:36-37).

Ndai hkye hkrang la ai magam hpe matut gun hpai na matu Yesu Sape ni hpe shaga la nna shanhte hpe matsun madun da sai. Shi a Sape tai ai gaw shi hpang hkan sa ai sak hkrung hkawm sa lam rai nga ai. Simun, Andrew, Yaku hte Yawhan ni gaw nga hkwi ai ni rai ma ai. Shanhte hpe “Ngai kaw hkan marit; masha hpe hkan hkwi na masha, ngai nanhte hpe shatai na made ai,” ngu nna shanhte hpe kabu gara shiga hkaw tsun na matu shaga la sai (Mk 1:17; Mt. 4:19; Lk. 5:10). Shanhte mung arai mahkra hpe kau da nna, Yesu kaw hkan nang sai. Yesu gaw shanhte a prat maka mahkra hpe galai shai kau ya sai. Yesu hpang hkan nang ai gaw asak aprat hpe ap nawng ai lam rai nga ai.  Masha ni a man e mara kap ai nga nna Hparashe ni n hkap la ai Levi, kang hta ai wa hpe mung Yesu shaga la sai. Kanghta ai sum makau hku lai sa wa yang, Yesu gaw Mahte hpe grai azi yu wu ai. Shing rai yu ai gaw, matsan dum tsawra ai majaw rai nga ai. Sape tai na matu, sape ni ninghkap nga ai kaw na, shi hpe Yesu lata la sai. Shi gaw arai yawng mayawng hpe kau da nhtawm Yesu kaw hkan nang wa ai (Lk. 5:27-28).

Hkristian ni hpe hkan sat hkawm ai Pawlu hpe mung shi hpang hkan nang na matu, shaga la nu ai. Pawlu gaw Damasku mare de Yesu hpang hkan ai ni hpe jahkrit shama ai hte sat kau na matu sa wa ai shaloi akajawng sha lamu de na nhtoi tu pru wa ai. Shi mung, ga de kadang taw mat ai hte Madu shi hpe shaga ai nsen hpe shi na dat wu ai  (Kasa 9:1-9). Shi hpe shaga la ai lam gaw laklai ai, shi a prat hpe galai shai ya shangun ai hte maigan amyu masha ni hpang de sa nna Kabu Gara Shiga hkaw tsun na matu rai nga ai. Myihtoi Yeremia zawn, shi n shangai ai aten kaw nna Karai Kasang lajang da ai hte shaga la ai lam hpe Galati masha ni hpe sakse hkam mu ai. “Dai Kasha a Kabu Gara Shiga hpe maigan amyu ni hpe hkaw tsun dan u ga, nye nu a hkritung nna pyi ngai hpe san tawn da ai Karai Kasang gaw Shi a chyeju a majaw ngai hpe shaga la nna shi Kasha a lam ngai hta shapraw dan na ra nga ai. Shaloi jang, ngai hkum shan yan, sai hpe bawng yu nngai n rai” (Gal. 1:15-16). San Pawlu zawn anhte Kabu Gara Shiga hpe hkaw tsun sakse hkam na matu, Yesu shaga la ai. Karai Kasang shaga la ai lam hpe anhte shinggyim masha ni a myit nyan hpaji hte n dep lu ai.  Anhte shinggyim masha ni myit ai lam hte Karai Kasang myit ai lam grai shai nga ai.

Yesu hpang hkan nang na hte Sape tai na n-ging dan ai lam ni hpe Kabu Gara Shiga hta shi madi madun da sai. Masha langai mi gaw, Yesu hpe “Nang sa ai shara shagu de, ngai nang kaw hkan sa na nngai,” ngu wu ai. Yesu gaw dai wa hpe “Chyahkyawn ni nhkun lu ma ai, ntsa malen pyen ai u ni mung, u yup lu ma ai; dai Masha Kasha chyawm gaw baw tawn na shara pyi n lu nga ai,” ngu nna shi hpe, tsun wu ai.

Bai Yesu gaw kaga wa hpe, “Ngai kaw hkan rit,” ngu wu ai. Dai wa gaw, “Nye wa hpe wa makoi na ahkang naw jaw e,” ngu wu ai. Yesu gaw, “Masha chyasi ni gaw tinang a chyasi ni hpe makoi mu ga: nang gaw Karai Kasang a mungdan lam sa hkaw dan su,” ngu nna shi hpe tsun wu ai.  Masha kaga langai wa mung, “Madu e, ngai nang kaw hkan nang na nngai; rai timung, nye nta na ni hpe wa shakram na ahkang naw jaw e,” ngu wu ai. Yesu gaw, “Na htai jum nna hpang de gayin yu ai wa kadai mung Karai Kasang a mungdan hte n-ging n dan nga ai,” ngu nna shi hpe tsun wu ai (Lk. 9:57 – 62; Mt. 8: 19 – 22). Yesu shi hpang hkan na matu shaga ai shaloi, anhte hte hkau mawn ai lit magam ni, chye chyap ai masha ni hpe tawn kau da nna, shi kaw hkan na hpe mahtang madung tawn da na ra ai.

Madu Yesu a Sape tai ai gaw Wudang hpai ai lam rai nga  ai. Yesu shawa masha ni hte shi a Sape ni hpe shi shaga la nna shanhte hpe tsun wu ai gaw, “Ngai hpang de hkan sa mayu ai wa kadai rai timung, tinang hkum hpe ndang kau nna, shi a wudang hpai let ngai kaw hkan nang ru ga” nga ai. Shani shagu tinang Wudang hpai let Yesu hpang hkan nang ai gaw, Sape langai mi hta nga nan nga ra ai marai ningja rai nga ai. Wudang hpai let, Yesu hpang hkan nang ai gaw, shanhte a Sara, shanhte a Madu Yesu zawn, shangun ma a amu hpe galaw daw ya na hte, masha law law a matu mara, asak hpe gawng malai jahpu shatai ya na lam rai nga ai hpe Sape ni hpang de grau chye la mu ai.