(Karai Kasang Wa a Tsawra Myit)

Karai Kasang a tsawra myit kaba a majaw, anhte Shi a ahpraw nsam hte bung pre ai hku hpan da hkrum saga ai. Tsawra myit gaw npawt nhpang, sari sadang hte sung htum ai shaga la ai lam rai nga ai. Dai gaw, Karai Kasang jaw ya ai chyeju kumhpa mung rai nga ai. Madu Yesu gaw, tsawra ai myit a kasi kamang rai nna, Kawa tsawra ai lam anhte hpe shadan shaleng ya sai. Wudang hta shi si hkam nna anhte hpe hkye la ai gaw tsawra ai myit a majaw rai nga ai. Shi galaw ai amu ni yawng gaw, tsawra myit hta madung tawn da nga ai. Anhte hpe shaga la ai madung gaw, Kawa hpe tsawra na matu, shi a tsawra myit hpe sakse hkam na matu hte Yesu hpang hkan nang na matu rai nga ai.

          Yesu Madu tsun ai hta, “Dai Madu na a Karai Kasang hpe, na a myit kraw lawang mahkra hte, na a myit masin mahkra hte, na a myit mang mahkra hte nang tsawra lu na ndai, nga nna hkang da ai ga gaw, grau kaba ai hte shawng na ga mung rai nga ai” nga ai,   (Mt. 22:37). Anhte hta nga ai n-gun atsam mahkra hte Karai Kasang hpe tsawra na matu shaga la hkrum ga ai.

          Madu Yesu, shi hpe gara hku tsawra na ra sharawng ai kun? Dai mahtai hpe Yawhan ka da ai Kabu Gara Shiga hta hti sumru yu mai ai.  Shi tsun ai, “Nanhte ngai hpe tsawra myit dai rai yang gaw, nye a ga matsun hkan shatup na myit dai” (Yn.14:15). Bai shi tsun ai, “Nye a ga matsun lu la nna hkan shatup ai wa gaw, ngai hpe tsawra ai wa rai nga ai: ngai e tsawra ai wa hpe, nye wa mung tsawra na wu ai” nga ai, (Yn.14:21). Matut nna shi tsun wu ai gaw “Ngai e tsawra ai wa rai yang gaw, nye ga matsun hkan shatup na ra ai” nga ai, (Yn.14:23). Ndai lam gaw Yesu ra sharawng ai tsawra myit rai nga ai. Tengman ai hte wenyi chyeju atsam lawm ai tsawra myit rai nga ai. Ndai tsawra myit hpe tatut hkan galaw ai shaloi, Yesu tsun ai ga tengman ai hpe mu mada na rai nga ai. Dai gaw, “Nye a kandang hpai loi ai hte, nye a lit mung, tsang nga li ai” nga ai, (Mt.11:30).

          Madu Yesu Shi hpe tsawra ai ni a matu ga sadi masum tawn da sai. Nambat langai gaw: “Ngai hpe tsawra ai wa rai yang gaw, nye ga matsun hkan shatup na ra ai: nye Wa mung dai wa hpe tsawra wu ai rai nna, an lahkawng gaw dai wa kaw sa nna shi hte rau hpawng de nga na ga ai” (Yn 14:23). Yesu Madu a Mungga hpe madat la ai gaw, Kawa Karai Kasang hpe anhte tsawra ai lam rai nga ai. Shi hte Kawa gaw, anhte hte rau sa nga nna, shan a garum shingtau ai chyeju hpe hkam la na rai nga ai. Hpang jahtum na nhtoi hta mung, ningdang kau ai lam n hkrum ai sha, Sumsing Mungdan a sutgan hpe lu la na rai nga ai. Anhte shi hte rau ngang kang ai nta hpe gawgap da sai majaw aloi sha n jahten lu sai.

          Nambat lahkawng na ga sadi gaw: “Nye a ga matsun lu la nna hkan shatup ai wa gaw, ngai hpe tsawra ai wa rai nga ai: ngai e tsawra ai wa hpe, nye Wa mung tsawra na wu ai: ngai mung dai wa hpe tsawra ai hte, ngai hkum nan shi e shadan dan na we ai” (Yn. 14:21). Kawa Karai Kasang hte Yesu Madu a tsawra ai hpe lu la na lam rai nga ai. Yesu a marang e, Kawa hpe grau chye chyang, hku hkau lu na hte Shan a shadan dan ai chyeju hpe lu la nna, Shan a ra sharawng ai lam hte sharin shaga ai hpe anhte grau chye chyang la lu na rai nga ai. Nhtoi hta anhte hkawm sa hkawm wa lu nna, nsin gaw anhte hpe hpa n di lu na rai nga ai.

Nambat masum na ga sadi gaw: “Nanhte ngai hpe tsawra myit dai rai yang gaw, nye a ga matsun hkan shatup na myit dai. Ngai mung Wa kaw hpyi nna, Wa mung, nanhte hte prat tup rau nga na matu, tengman ai hte seng ai, Wenyi ngu ai Shalan Shabran ai Wa kaga, nanhte kaw shangun dat ya na ra ai” (Yn. 14:15-16). Chyoi Pra ai Wenyi hpe shangun dat nna Dai Wenyi a chyeju amyu myu hpe lu la na lam rai nga ai. Chyoi Pra ai Wenyi gaw anhte hte rau nga nna anhte hpe chyeju amyu amyu jaw ya na rai nga ai. Dai chyeju ni gaw, lam shagu hta htauli htaula sawn sumru yu nna, Karai Kasang myit ra ai hte maren kangka sak hkrung nga sa lu na matu anhte hpe lam woi ya ai. Makam masham hte seng ai teng man ai lam ni hpe mung, sung sung aloi sha chye na myit hkawn lu na matu garum ya ai. Shani shagu na sak hkrung lam hta Karai Kasang a tengman ai lam, Kaja ai hte n-kaja ai hpe ginghka chye ai chyeju lu la ai. Nden ja ai chyeju, hkum hkrang hte seng ai, wenyi hte seng ai, tengman ai lam ni hpe mu tam nna, Karai Kasang myit ra ai hte maren matut mahkai chye na na matu garum ya ai.

          Chyoi Pra ai Wenyi a apu asi ni gaw, tsawra ai, kabu gara ai, ngwi pyaw simsa ai, myit galu kaba ai, hkam sharang chye ai, matsan dum chye ai, sumnung shingdi si mani ai, sari rawng ai, tinang myit hpe hkang dang ai hte myit san seng, san pra ai lam rai nga ai (Gal.5:22-23). Ndai lam masum gaw, Yesu hpe tsawra ai a marang e, anhte lu la na chyeju ni rai nga ai.

          Yesu hkang da ai tara lahkawng gaw, “Na a htingbu wa hpe, na a hkum hte maren, nang tsawra lu na ndai” nga ai, (Yn. 14:39). Htingbu wa hpe tsawra ai ngu ai lam hta, tinang n ra ai masha hte, n chye ai masha ni hpe mung Yesu Madu hte, Yesu Madu hta tsawra, ra na rai nga ai. Ndai zawn galaw lu ai gaw, anhte a myit kraw kata hta Karai Kasang hpe chye chyang, tsawra, kamsham ai myit kaw nna pru wa ai apu asi rai nga ai. Yawhan laika langai (4:8,16) hta “Tsawra ai myit n rawng ai wa gaw, Karai Kasang hpe chye chyang wu ai n rai, kaning rai n me law, Karai Kasang gaw tsawra myit rai nga ai,” nga ai.

          Wa Sarabyin Francis tsun ai hta, “Karai Kasang a tsawra myit gaw, katsing hprap hprap kanu kawa zawn shi a tsawra myit hpe madun nga ai. Dai tsawra myit gaw, pu sin dun ai tsawra myit re. Dai gaw matsan dum ai, mara raw ya ai, myit masin hkum hkrang ting hkam sha ai, n-gaw n wai ai hte hpring ai mabyin masa hte maren, sung ai mahkrun lam ni kaw nna, gale lwi pru wa ai tara rai nga ai” nga ai, (MV 6).

          Yesu Madu gaw, Karai Kasang a tsawra myit hpe shadan shaleng ya ai. Shi a prat tup Kabu Gara Shiga hpe hkaw tsun ai shaloi, dai tsawra myit hpe masha ni mu lu, jum tek hkra lu ai zawn, dai ni shi shaga ai ni mung shi galaw ai hte maren galaw daw jau na ra ai. Grau nna, mara kap ai ni, matsan ai ni, hkawn kau hkrum ai ni, machyi makaw hkrum ai ni hte ruyak jamjau hkrum ai ni a man e, shi madun dan ai lamik kumla ni gaw, tsawra matsan dum ai amu ni rai nga ai.

          Anhte hpe shaga la ai gaw,  tsawra matsan dum ai amu ni hpe tatut galaw nna, Karai Kasang hpe anhte tsawra ai ngu ai hpe sakse hkam nhtawm, Yesu Madu a jet ai Sape tai na matu rai nga ai.