Ngwi pyaw simsa lam lu la na matu Karai Kasang hpe hpa majaw ra nga ga ai kun? Simsa lam a ru pawt madung rai nga ai, madu Yesu kaw, kam shamyet let kyu hpyi nga ga.  DOCAT [270 -271]  Ngwip

yaw simsa lam a madu rai  nga ai, Yesu hkristu gaw, Yawhan a laika hta ning nga nna n gun jaw da nga ai.“Ngwi pyaw ai gaw ngai nanhte hta da ya ma sa de ai; nye a ngwi pyaw ai nanhte hpe ngai jaw 

ma de ai: mungkan ga na ni jaw ai zawn, ngai nanhte hpe jaw  ma de ai n rai. Nanhte myit hkum ru myit, hkrit mung hkum hkrit myit.” Yn. 14:27

Simsa lam gaw shinggyim masha garai n nga ai ten kaw nna Karai Kasang shabyin da ai lajang da ya sai masing langai rai nga ai. Dai majaw simsa lam hte seng nna gawn yu jang Karai Kasang gaw madung nan rai nga ai. Karai Kasang n lawm ai sha simsa lam tam shakut ai wa kadai mung Paradisu kaw n nga lu sai. Mungkan ga ntsa e simsa lam n nga ai gaw Karai Kasang hte shinggyim masha lapran myit hkrum ai lam ayai mat sai ngu ai lachyum re. Shinggyim masha a labau gaw adip arip roi sha ai, lachyen ginhka ai, du daw sai hkaw ai labau rai  nga ai. Shing re labau hta nga kaba wa ai anhte shinggyim masha ni gaw, mara a majaw sum mat ai simsa lam hpe galoi mung marit nga ga ai, galoi mung hpang gara nga ga ai. Dai re majaw myit kraw kata e zim nga let sha, Karai Kasang hpe galoi mung marit nga ai, ala dingda nga ai.

(1) ngu na mungkan majan hta akyu hpyi laika pa kaji dip shapraw nna, hti lang lai wa sai laika pa hta ning nga nna ka da ai.

“Madu e, ngai hpe na a simsa lam a lakung lakap shatai ya rit. Nju ndawng nga ai kaw, tsaw ra ai lam gat hkai lu u ga; hkala nba hkrum ai ten, mara dat ya lu u ga; ung ang ai ten, kam sham ai myit jaw ya rit; myit htum ai ten myit mada lam jaw ya rit. Nsin chyip re ai ten hta, nhtoi jaw ya rit; yawn hkyen ai ten hta, kabu hpa jaw ya rit.” nga nna ka da ai.

Lachyum gaw, majan pa hta, hkawm sa nga ai hpyen la ni, majan a majaw hprawng hkawm nga ai, hpyen yen ni, lam amyu myu hku nna jahkrit shagyeng hkrum nga ai ni, yawng myit n gun lu na matu, simsa ai chyeju lu la na matu, Karai Kasang kaw hpyi ai kyu hpyi ga rai nga ai. Simsa lam hpe shabyin ya lu ai wa gaw Karai Kasang sha re ngu ai hpe sakse hkam ai rai nga ma ai.

Madu Yesu hkum nan mung Si ai kaw nna bai hkrung rawt ai hpang, kasa ni hpe sa shakram ai shaloi “Nanhte ngwi pyaw simsa nga myit ga.” Nga nna shakram lai wa sai.Lk 24:36  

Ga Shaka Dingsa hta myihtoi ni tau tsun da ai gaw lani mi na nhtoi hta n-gun rawng ai Messia (Hebrew ga hta: Sau chya hkam ai wa = Greek ga hta: Hkristu) du sa na ra ai ngu nna tsun da ai. Ndai Messia/ Hkristu gaw shaning law law ala nga ai, simsa ai ten hpe shabyin ya na re, mungkan ningnan jaw ya na re “ chyahkyawn gaw sagu kasha hte rau shanu nga nna, rawng gawk gaw bainam kasha hte rau hpum nga na ra ai; dumsu kasha gaw hkanghkyi hkalung hte hpum nga na ra ai. Hpum sau ai yam nga hpe, ma kaji dun woi na ra ai” (Esaia 11:6).

Messia gaw “Simsa ai a Hkawhkam Kasha rai na ra ai, ” (Esaia 9:6) Ndai chyum mungga ni hpe maram yu yang,“Yesu gaw mungkan ningnan a npawt nhpang ningnan re ngu Hkristan ni kam ma ai. Shi gaw reng dik htum ai simsa lam a npawt nhpang shabyin ai wa re, anhte shinggyim masha hpe mara a mayam prat kaw nna shalawt dat ai hte hkye la ai wa re, dumbri dumbra byin shangun ai ru pawt hpe adawt kau ya ai wa re. Udang hta Shi  si hkam ai hte, Yesu Hkristu gaw shinggyim masha hte Karai Kasang hpe hku hkau lam bai matut ya nna, masha ni hpe n ju n dawng myit garan shangun ai lam hpe run la kau ya ai rai nga ai.”( Ehp.2:1-16).

 Madu Yesu gaw,  mungkan  ga de du sa ai shaloi “mungkan ga ntsa e simsa ai” lam mung du sa wa sai. Si hkam nna mungkan ga hpe Shi shakram kau da ai shaloi, Shi a simsa ai hpe mungkan ga hta jaw da ya nna, sumsing lamu de lung wa sai.” Nga nna moi na Hkristian myitsu langai mi ram ma ni hpe sharin shaga lai wa sai.

“Karai Kasang gaw anhte a lata e shadum shahprang nga ai zawn, Hkristu a lam htinglet ya ai kasa ni anhte rai nga ga ai; Karai Kasang hte htinglu htinglai mu, ngu nna Hkristu a jaw e anhte hpyi nem ga ai.” Nga nna kasa Pawlu gaw Corintu masha ni hpe shadum n gun jaw ya sai.2 Kor 5:20

Hpu nau ni, dai ni na ten hta Anhte Myanmar mung kata e, simsa lam, tara rap-ra lam ngu ai hpe dik hkra hpang gara nga ga ai. Anhte myityu mangyu chye ai ni, myitsu sai ni yawng gaw aten tup, yup tim, sha tim, bungli galaw tim, ban sa la tim, akyu hpyi tim, simsa lam lu na matu chyu sha myit nga ga ai. Akyu hpyi nga ga ai. Simsa la a npawt aru madung rai nga ai, Madu Yesu kaw myit galu sadi dung let matut kyu hpyi nga ga law.

 Anhte gade kyu hpyi shakut tim hpa mahtai nlu ai zawn hkam sha na ga ai. Kaja wa nga yang, madu Yesu gaw mahtai jaw magang nga sai. Anhte ra ai hku raw, tup hkrak gaw n rai tim, gawai ai lam hku nna jaw magang nga sai hpe, kaja wa myit mang sumru chye ai, dinglik yu chye ai ni kadai mung, mu chye na ga ai. Simsa lam a matu shakkut nga ai myitsu ningbaw ningla ni, Generation –Z ni, ram ma kaji kaba ni, myu tsaw magam gun ni yawng hpe Karai Kasang shaman ya u ga law.