Wa Sarabyin Francis ka matsun da ai (LAUDATO SI) gaw Mungkan ga hte anhte a makau grupyin shingra  tara hpe makawp maga ga ngu ai sharin matsun laika rai nga ai. Wa Sarabyin Francis tang madun ai gaw, anhte shanu nga ai mungkan ga gaw anhte hte rau sha nga nna, asak hkrung nga pra nga ai tsawra ai kanu hte bung nga ai. Anhte hpe tsawra ai lata hte lakawn ya nga ai chying hkai kanu rai nga. ITALY mung Asisi mare na San Pra ai FRANCIS a mahkawn ga hta mung lawm nga ai.

Mungkan ga gaw, anhte shinggyim masha ni hpe madi shadaw ya ai, up hkang nga ai. Anhte sha na nsi nai si ni, namsi namsaw ni, tsi pawt tsi ru ni, n sam amyu myu rawng ai nampu nam pan ni hpe jaw ya ai. N dai mungkan ga hpe yu yu nna Karai Kasang hpe chyeju dum shakawn na lam grai law nga ai.

Karai Kasang gaw mungkan ga hpe grai tsawm htap hkra hpan lajang da ya ai raitim, anhte shinggyim masha ni gaw, makawp maga lit la chye ai lam n nga ai sha kam ai hku jahten shaza shama kau nga ai. Anhte a kanu hte bung ai mungkan ga hpe tinang sha madu zawn, kam ai hku jahten lai wa ai ni nga ai. Lamu ga, ga sau ni, hka ni, nbung ni hten za mat wa ai majaw, dusat du myeng ni, hpun kawa namsi namsaw ni mung hten mat wa ai, machyi makaw ana ahkya law mat wa ai. Lamu ga gaw shi n dang hkam lu ai jahten sharun lam hpe hkam sharang ra nga ai majaw, lamu ga a prat gaw zingri zingrat, jahten sharun hkrum ai, matsan jam jau hkrum ai kanu langai hte bung nga ai.

Anhte shinggyim masha ni gaw, ga yun kaw na galaw shachyaw da ai rai nna, anhte a hkum hkrang gaw lamu ga kaw na jaw ai, hka, n bung, namsi nam saw ni hte sha asak hkrung nga ga ai hpe, malap kau chye nga ai. Dai majaw, lai wa sai 1962 ning hta, America, Russia, Cuba manghkang hta Nueclear majan byin na jin jin rai nga ai ten hta, Wa Sarabyin Yawhan (23) kaw nna “Peace on Earth” mungkan hta ngwi pyaw simsa ai lam nga u ga ngu ai matsun laika htuk shabra dat nna, majan n byin hkra simsa lam hpe jawm gaw gap lai wa sai.

Wa Sarabyin Francis hku nna mung ya aten hta, mungkan ga makau grup-yin shingra tara ni hten za ma wa ai majaw, mungkan ga, lamu ga, hka panglai, jan shata, n bung kaja ni hpe machyu nna, asak hkrung nga ai, shinggyim masha dusat dumyeng, hpun kawa ni mung hten za ma wa nga ai majaw, anhte shinggyim masha ni lawan hkye la, makawp maga la na hpe wa Sarabyin shadum n gun jaw dat nga ai.

Ndai mungkan ga gaw, asak hkrung mahkrung yawng shingbyi shanu nga ai nta shara re ai majaw, hpung makam masham amyu shagu, shinggyim masha amyu bawsang shagu rau jawm bawngban nna, byin nga ai manghkang jawm hpyan la na aten du sai nga nna Wa Sarabyin Francis tsun shana da nga ai.

Pope Francis