Ga shaka dingsa prat hta Israela masha ni gaw, Karai Kasang Lata la ai Karai Kasang a amyu sha ni, shing n rai, dai ten na Karai Kasang hpe Kam sham ai Nawku hpung rai nga ai. Dai hte maren, Yesu Hkrsitu hpe kam sham nna shi a kabu gara shiga hte maren sak hkrung nga sa ai masha ni gaw, ga shaka ningnan prat na “Nawku hpung,” Shing n rai “Karai Kasang a amyu sha ningnan” ni rai nga ai. Dai amyu sha ni gaw, Hkristu hta ningnan bai hpan da hkrum ai, Hkristu a hkum hkrang daw shan ni tai wa sai rai nna, shanhte a baw gaw Hkristu, shanhte yawng pawng gaw “Hkristu a hkum hkrang” ngu ai “Nawku hpung” tai wa sai.

Nawku hpung gaw hpaji hkum sumhpa sharin ai “dakkasu” jawng langai mung rai nga ai. Raitim, dai gaw shinggyim masha hte seng ai n’rai, dinghta ga ntsa e Karai Kasang a kabu gara shiga hkaw tsun shachyam shabra na hte hkye hkrang la ai magam hpe matut galaw na matu Yesu hkum nan hpaw de da ai, Karai Kasang hte seng ai jawng rai nga ai.

Dai majaw Nawku hpung ngu ai gaw, Hkristu hpe kam sham hkap la nna shi a kabu gara shiga hpe shanhte a sak hkrung lam hku hkan sa ai kam sham ai hpung masha yawng hpe ngu mayu ai rai nga ai.

San Augustine tsun ai hte maren bai tsun ga nga yang, “Nawku hpung gaw, mungkan ting chyam bra nga ai kam sham ai hpung masha ni hpe shangai shaprat ya ai, langai sha re ai Kanu rai nga ai.” Kanu Kahtawlik Nawku hpung gaw, shi hkum nan sagu rem wa rai nna shara shagu bra hkawm mat wa ai sagu ni hpe hkan tam nga ai. Gawng kya ai sagu ni hpe n-gun ban ya ai, machyi ai ni hpe tsi tsi ya ai hte hkala nba hkrum ai ni a n’ma hpe ahkyen lajang ya ai wa rai nga ai.

Ndai amu magam ni hpe Nawku hpung gara hku galaw a ta? Karai Kasang a hkye hkrang la ai kabu gara shiga hpe hkaw tsun, shachyam shabra ai hte Yesu hkum nan shabyin da ai Sakramentu ni hku nna galaw nga ai.

Dai rai yang, Sakramentu ngu ai gaw hpa rai ta? Anhte a Kanu Nawku hpung sharin shaga ai hte maren, Sakramentu ngu ai gaw, Chyoi pra ai wenyi a atsam hte Nawku hpung a baw Yesu gaw, shi a hkum hkrang rai nga ai; Nawku hpung ting hpe, shi a chyeju kumhpa ni garan jaw ya ai, “ Karai Kasang a hkrang madu magam” rai nga ai. Chyeju garan jaw na matu Yesu Hkristu        shabyin tawn da ai dan leng ai kumla ni rai nga ai.

Kahtawlik hpung masha tai ai ngu ai gaw,

Ø Hpan da mada mahkra hta Karai Kasang nga ai hpe kam sham ai hte dai mahkra, grau nna shinggyim masha shada) hpe hkungga ai lam rai nga ai.

Ø Karai Kasang gaw lam amyu myu, grau nna shi a kasha hpe shangun dat ai hku nna, shi a tsawra myit madun dan nga ai, ngu ai hpe kam sham ai lam rai nga ai.

Ø Kasa ni hte shawng nnan na Nawku hpung sharin shaga ai htung lai hte maren, Yesu a hpang hkan nang nna Yesu a Karai asak hta shang lawm ai lam rai nga ai.

Ø Makam masham lam shagu hta tatut shang lawm nna, dai makam masham hpe sakse hkam ai kam sham ai masha uhpung hte seng ai masha tai ai lam rai nga ai.

Ø Nawku hpung hta, grau nna, Sakramentu ni hku nna “Yesu teng teng bai du sa na, ….  re ai lam hpe ngang kang ai hku sakse hkam, tsun dan ai lam rai nga ai.

Dai rai nna, Kahtawlik hpung masha ni gaw, “Karai Kasang anhte hte nga ai” ngu ai hpe kam sham ai hte maren dai hpe shaleng ya ai, chyeju jaw ai kumla ni rai nga ai. kashin kamun, n-gun shaja, chyoi pra hkum, mara raw, machyi masha ni hpe sau chya ya ai, Jau shatai ai hte num hkungran Sakramentu gaw, Kahtawlik sak hkrung lam hta ahkyak dik ai daw rai nna, dai Sakramentu ni hpe dingman ai hku man man hkam la ai gaw, hkrung nga ai Kahtawlik masha langai a masat kumla langai mi rai nga ai.

Sakramentu ngu ai gaw, majoi aten man man galaw ai htung lai sha n rai, dai gaw hkrung rawt sai Hkristu anhte hta shanu nga ai hpe mung, dai hpe hkam la shagu shi madu hte anhte hkrum zup lu ai hpe mung, madun ya ai kumla rai nga ai, nga nna Vatican Zuphpawng II hta tsun da sai.

Moi na prat hte matut mahkai ya ai ngu yang, anhte a shawng e nga lai wa sai ni a prat hta Karai Kasang shanhte hpe gara hku chyeju jaw lai wa sai hpe myit dum nna n-gun lu ai hpe ngu mayu ai. Ya na prat hte matut mahkai ya ai ngu yang, anhte Sakramentu ni hpe hkam la ai shaloi, ya ya jang Madu Yesu anhte kaw du sa ai hpe kam sham let shi hte rau kabu gara sak hkrung lu ai hpe ngu mayu ai. Du na ra ai aten hte mung matut mahkai ya ai ngu yang, du na ra ai aten, ndai dinghta ga ntsa e sha n rai, hpang na prat du hkra Karai Kasang a tsawra matsan dum lama ai chyeju gaw anhte hte rau a nga nga na re hpe kam sham ai majaw, kabu gara myit mada let asak hkrung lu ai hpe ngu mayu ai.

Kahtawlik hpung masha ngu ai gaw, kadai ni, kaning re ai ni re ai ngu ai hpe madun ai masat kumla madang rai nga ai. Bai, Karai Kasang gaw Sakramentu ni hku nna prat hte prat gara hku shi a chyeju ni hpe garan jaw ai, dai hpe Nawku hpung gara hku shagrau hkalum la ai, Sakramentu hpe hkam la ai a marang e, dai ni anhte a prat hpe gara hku akyu jaw ai, ngu ai lam ni hpe sang lang da ai.

Sakramentu ni hku nna Nawku hpung gaw,

(a)  Yesu a hkye la ai/ Sasana magam hpe matut galaw ai.

(b)  Nawku htung lai ni hku nna anhte hte rau nga ai Hkristu hpe shakawn shagrau ai.

(c)  “Karai Kasang a chyeju kumhpa” ni hpe anhte a prat mabyin masa ni hte matut mahkai ya ai, ndai lam masum hpe galaw nga ai.

Liturgy