(Sasana Magam Galaw na Matu, Karai Kasang Wa Shaga La Ai Re)

Kawa Karai Kasang a Hpung Shingkang dan leng wa na matu hte Hkristu a Mungdan mungkan ting chyam bra wa  na matu Nawku Hpung hpe Yesu gaw de da sai. Yesu gaw Nawku Hpung a Baw rai nga ai. Dai zawn, Nawku Hpung a Baw rai nga ai Yesu hte matut mahkai nga ai a marang e, Kasa ni tai na lit hte ahkaw ahkang ni hpe lu da ga ai. Mungsung lam rai nga ai Nawku Hpung hkum hkrang shamu shamawt galaw sa wa ai bungli ni hpe Sasana magam “Apostolate” nga nna shamying ai. Hkum hkrang a daw chyen ni shada n bung, shanhte galaw ai bungli ni n bung tim, yaw shada ai lam langai sha a matu rai nga ai zawn, Nawku Hpung hta mung maren rai nga ai. (Eph. 4:16). Anhte gaw, Kashin Kamun Sakramentu a marang e Hkristu a daw chyen ni tai wa nna, N-gun Shaja Sakramentu a marang e Chyoi Pra ai Wenyi a atsam hpe lu da saga ai. Yesu Hkristu gaw, Nawku Hpung Sasana bungli yawng a npawt daju rai nga ai.

          Sasana galaw na matu shaga la ai gaw, masha yawng hkye hkrang la hkrum na matu ap nawng daw jau lam rai nga ai. Karai a Mungga hpe aga hte mung, amu hte mung, htawn shana nna Yesu a chyeju ningsang hpe shalai ya na matu rai nga ai. Karai Kasang anhte hpe kaja wa teng teng alak mi sasana amu magam gun na shaga la ai shaloi, galaw lu na chyeju atsam mung Shi jaw ya nga ai. Shi a chyeju gaw yawng hpe hkang dang lu ai hte galaw lu ai n-gun atsam rai nga ai. “Nye a chyeju gaw na a matu ram nga ai; masha a gawngkya ai hta nye a n-gun atsam hkum tsup nga ai” (2Kor. 12:9).  Shinggyim masha a labau hta Karai Kasang gaw sasana amu gun hpai ai ni hte rau shang lawm galaw nga ai.

          Sasana amu magam yawng gaw, Karai Kasang a tsawra matsan dum ai hta madung tawn da ai. Tsawra, Matsan dum ai mungsung hpe sasana amu galaw ai ni galoi mung myit sumru yu na, ra nga ga ai. Dai gaw, ngwi pyaw simsa ai tem si rai ai hte kabu gara hka hpawk rai nga ai. Anhte a hkye hkrang la ai labau gaw dai hta mahtai nga ai. Dai majaw, matsan mayan ai ni, kabai da hkrum ai ni, bawngdung ai ni hte n tara ai hku jeyang daw dan hkrum ai ni a nsen hpe galoi mung madat mara ra ai. Shahte a malai mahtai tam garum ya ra ai. Madu saw shaga ai nsen hpe madat la nna, shi a ding hpring ai lam hta tinang a hkum hpe tinang ap nawng let shada daw jau na ahkyak la nga ai.

           Karai Kasang shaga la ai gaw shada daw jau na matu rai nga ai. Tinang a akyu, ding hkrai tam na matu n rai nga ai. Karai Kasang a masha tai wa ai gaw kaga masha a matu rai nga ai. Tsun mayu ai gaw, shangun ma tai nna kaga masha hpe galaw daw na matu hte hkye la ai amu magam galaw na matu rai nga ai.