(Karai Kasang Wa a Shaga La ai Nsen)

“Nawku Hpung hte mungkan hta shawa hpung masha ni hpe shaga la ai lam hte shanhte a sasana lit magam” (Vocation and the mission on the Lay faithful in the Church and in the world) ngu ai Sanpra ai Wa Sarabyim Yawhan Pawlu II a matsun laika hta rawng ai hte maren, “Karai Kasang a shaga la ai lam gaw yawng hte seng ai. Madu Yesu hkum nan masha shagu hpe mungkan hta sasana magam gun hpai lawm na matu shaga la sai” rai nga ai.  “Nanhte mung dai sun de sa wa mu,” ngu ai (Mahte laika 36: 3-4) hte maren, Madu Yesu hkum nan, anhte yawng hpe shi a sabyi sun e, ningchyang shang shangun da ai rai nga ai. Ndai dinghta ga hta, shi a amu gun hpai na matu Shi anhte hpe shangun dat sai.

Karai Kasang a shaga la ai lam n bung hkat ai: nkau mi hpe Jau, Brother, Mama tai nna daw jau na matu, nkau mi hpe kun dinghku de nna, magam amyu myu gun hpai let daw jau na matu, nkau mi hpe Tarahkaw Sara/num ni tai let daw jau na matu, kaga nkau mi hpe kun dinghku n de ai sha, tinang a sak aprat hpe ap nawng daw jau na matu shaga la nu ai. Shaga la ai lam n bung timung Karai Kasang a yaw shada ai lam gaw langai sha rai nga ai. Anhte masha tai wa ai shani kaw nna, Karai Kasang a kashu kasha ni tai wa na matu shaga la hkrum sai majaw Shi hpe kangka ai hte prat tup daw jau sakse hkam na matu gaw anhte a lit rai nga ai. Dai gaw, tut nawng e, anhte shi hpe shagrau shakawn ai lam rai nga ai.

San pra wa na hte sasana magam gun na lit hpe Kashin Kamun hkam ai shaloi masha shagu lu la ai rai nga ai. Dai gaw ginghka kau n mai ai lit magam rai nga ai. “Redemptoris Missio” ngu ai laika numbat (71) hta, “Kamsham ai hpung masha shagu gaw, chyoi pra ai hte sasana magam a matu shaga la hkrum ai re,” nga ai. Nawku hpung gaw, Karai Kasang hpe kam sham tsawra ai masha shagu hte seng ai shinggyim hpawng shingra rai nna, dai kaw lawm ai hpung masha shagu, san seng san pra ai hte sasana magam hta shang lawm na matu shaga la hkrum ai ni rai ma ai. Kashin Kamum hte N-gun Shaja Sakramentu ni hpe hkam la sai hpung masha shagu gaw, Madu Yesu Hkristu a Jau, Myihtoi hte Hkawhkam aya hpe garan hkam la sai ni rai nga ai. Ndai aya masum a marang e Nawku Hpung a sasana magam bungli hpe gun hpai na matu lit nga ai. Masha ni hpe hkaw tsun ai, jasan jaseng ai bungli ni hpe galaw ai shaloi dai aya ni hpe gun hpai nga ai. “Hpung masha ni shanhte galaw nga ai mungkan a bungli amyu myu hpe, Hkristu a Kabu Gara Shiga hte maren, hkan galaw let bungli ni hpe jasan jaseng ai shaloi mung, shanhte gaw mungkan a matu kaja ai matsi tai nga ai” (AC1).

Saradaw Kaba Oscar V. Cruz tsun ai hta, “Hpung masha ni hpe shaga la ai lam gaw, shinggyim hpawng galai shai wa na matu, shanhte sakse hkam ai, daw jau ai hte Kabu Gara Shiga hpe hkaw tsun na matu rai nga ai,” nga ai. Bai, “Shanhte hkam la ai Kashin Kamun hte N-gun Shaja Sakaramentu a marang e, Nawku Hpung hta ahkaw ahkang hte lit magam ni mung nga wa ai rai nga ai” nga ai.

Sasana magam gun hpai ai lam gaw, anhte yawng hte seng ai lit magam rai nga ai hpe anhte shawng dum chye ra ga ai. Dai re ai majaw, hpung masha shagu gaw Nawku Hpung tara shang masat da ai, hpung langai ngai hta shang lawm nna, Kasa/Sape bungli hpe galaw ra ai.

Anhte a prat hta, “Ngai hpang hkan rit” nga nna Yesu shaga ai lam nga na re. Hkrak gaw kaga masha langai ngai hku nna, shing n rai, mabyin masa langai ngai hku nna Shi shaga ai. Dai shaloi anhte a prat dingsa hpe kau da gwi nna, Karai Kasang shaga ai prat nnan de sa wa nhtawm, Karai Kasang madun ai amu hpe sharawng shara gun hpai na ra ga ai. “Nanhte ngai hpe lata la mi ai n rai, ngai she nanhte hpe lata la ni ai” (Yn. 15:16)  nga ai hte maren, shaga la ai lam gaw chyeju kumhpa nan rai nga ai hte, mauhpa mung rai nga ai.