17 August 2020

ANHTE YAWNG SANPRA MASHA TAI NA MATU MADU SHAGA NGA AI

Anhte marai shagu hpe sanpra ai masha tai na matu Madu shaga nga ai; ya nang ngai hpe nan Madu shaga nga ai, “Ngai sanseng sanpra nga ai zawn, nang mung sanseng sanpra nga u,” (J.j. 11:44; cf.1 Pet. 1:16). Vatican Zuphpawng Kaba (2) hta e ndai lam hpe asan sha shadum da nga ai. “Hpung masha shagu hpe, kaning re sakhkrung lam hta mi  raitim, shi hte shi, Kawa Karai Kasang zawn ra n rawng hkra, sak hkrung lu na matu, shaman chyeju, law law jaw da sai,”nga nna shadum da ai.

   Vatican zuphpawng Kaba hta tsun bawngban  ai ,“ shi atsam hte shi, shi ladat hte shi” ngu ai ga gaw, grai ahkyak ai. Sanseng sanpra ai de du wa lu na matu, n mai byin ai zawn rai tim myit n mai htum ai. A sum n jaw, myit n htum na matu, sanpra masha ni a kasi kamang ni gaw anhte hpe garum n-gun jaw ya nga ai. Raitim shanhte hpe “raw nan” n hkan hta la na grai ahkyak ai. Anhte a matu Madu lak san yaw shada da ai masa hte atsam marai ni nga ai hpe dum chye ra ai. Ti nang hkum dek a matu kaja dik, ra dik ai shaman chyeju hpe, shi a salum kaw bang da ya sai; dai chyeju atsam hte tinang a sanpra lam hta shakut shaja sa wa ra ai.( 1 Kor.12:7) Shanhte a matu Karai Kasang  yaw shada da ai hku anhte n hkan galaw ra ai. Dai gaw lachyum n pru ai hku hkan sharau, hkan shatup ai rai nga ai. Karai Kasang a sakse tai na matu anhte yawng hpe shaga nga ai; raitim  masing masa gaw shai nga ai. lata ginhka nna  chye madat ra ai. Ndai lam hte seng nna Udang sharawng ai Sanpra ai Yawhan (St. John of the Cross) “Wenyi Yungwi/ Spiritual Canticle” laika kaw tsun ai gaw, “hkan shatup yak ai hte tin shapun masat jahkrat tawn ai hkansa tara ni hpe shi koi yen kau ai, nga nna tsun ai.” Shi a yungwi mahkawn kaw “shi a hkrang, shi a atsam hte maren” nga nna asan sha shadum da ai. “Karai Kasang gaw langai hta amyu mi, kaga langai hta kaga amyu mi” jaw ya nna shang lawm nga ai.

    Ndai zawn re ai hkrang ni, atsam marai ni hte seng nna “nu num ni a atsam marai” (genius of woman) ngu ai laika buk hta, Amyu shayi ni hta e mung Karai Kasang a chyoipra ai a shingna hpe mu lu nga ai. Dai gaw grai ahkyak ai lam re. Mungkan ntsa amyu shayi ni gaw yu kaji hkrum ai ni rai ma ai. Raitimung, Nawku Hpung ra kadawn wa ai ten, gawgap sharai ra ai ahkyak ai aten ni hta, sanpra ai masha amyu shayi ni hpe Karai Kasang shalat dat ya sai; ga shadawn, Bingen mare na Sanpra ai Hildegard, Sanpra ai Bridget, Siena mare na Sanpra ai Catherine, Avila mare na Sanpra ai Teresa, Lisieux mare na Sanpra ai Therese ni gaw grai dan leng ai ninghkring ni rai nga ma ai. Kade e mung n chye ya ai, malap da hkrum ai amyu shayi ni hpe mung ngai myit dum ai. Shanhte gaw dinghku kata, wuhpung kata kaw galai shai ra ai lam ni hpe shi atsam, shi masa hte sakse tai nna shading sharai galai shai ya ai ni hti n dang hkra nga nga ma ai.

   Tsun shadum lai wa sai lahta na lam ni gaw, anhte hpe n-gun jaw ya na matu rai nga ai. Moi chyaloi nhkoi kaw nna Karai Kasang anhte marai shagu hpe jaw da ai shaman chyeju hkrang ladat hte sakse tai sak hkrung ra ga ai. “Ning nu a hkritung kaw ngai nang hpe garai n shabyin ai ten kaw nna, nang hpe ngai chye ai; nang garai n shangai ai kaw nna, ngai nang hpe shachyoi shapra da ya sade ai,” (Yere. 1:5)

Kabu hkinnum let aw law nga  mu

# Pope Francis                                                                                                                                                                                                                         August 17, 2020