“KABU SHARAWNG AWNG AI TSAWRA MYIT” (THE JOY OF LOVE) ngu ai laika book gaw Wa sarabyin Francis, 2016 ning hta ka da ai “AMORIS LAETITIA” hpe Jinghpaw hku ga gale da ai laika rai nga ai. Ndai laika gaw, Wa Sarabyin Francis kaw nna Dinghku kata na Tsawra Myit hte seng ai lam, Saradaw, Jau, Sasana Magam Gun ni, dinghku Kanu kawa ni hte hpung masha Ji nban yawng hpe, Kasa ni a sharin shaga hkrang hte lit nga ai hte maren, sharin shatsam dat ai mungga rai nga ai.

Ndai laika gaw, lai wa sai aten na Saradaw Kaba ni a zuphpawng hta mungkan shara shagu de nna sawk sagawn la sa ai, “Dinghku mahkrum madup” lam ni hpe azin ayang, sumru yu nhtawm, ka da ai laika rai nga ai. Dai ni na aten hta byin hkrum hkam sha taw nga ai dinghku mayak manghkang lam ni hpe hpaji jaw, lam woi shading sharai ya nna, san seng chyoi pra ai dinghku ni tai wa na matu n-gun jaw lam madun matsun ya nga ai.

Ndai matsun lai ka hpe hkap hti hkaja ai ni yawng mung, sasana amu gunhpai ai hta Wenyi lam hte shinggyim nga sat nga sa bawngring rawt jat lam hpe kapyawn nna jawm pawng galaw yang, dinghku ni ngwi pyaw, myit hkrum myit ra, tsawra myit ngang kang ai hte Karai Kasang a Mungdan gawgap ai lam awng dang lu na rai nga ai. Dai rai nna, Wa Sarabyin a matsun laika hpe hti, hkaja, sumru yu nna tatut jai lang akyu jashawn na matu yawng hpe n-gun jaw mayu ai.