LAHKAWNG LANG NGU NA MUNGKAN TING HTE SENG AI KAJI KAWOI NI HTE ASAK KABA SAI NI A NHTOI HTA WA SARABYIN FRANCIS TSUN SHANA AI MUNGGA

“IN OLD AGE THEY WILL STILL BEAR FRUIT.” (PSALM 92:14-15)

“SHANHTE GAW ASAK KABA TEN DU HKRA ASI NAW SI NA MARA AI.”                                                              ( SHAKAWN KUNGDAWN GA 92:14-15 ) 

Shakawn kungdawn ga 92:14-15  hta “ Shanhte gaw asak kaba ten du hkra  asi naw si na mara ai.” ngu ai Kabu gara ai Chyum mungga hpe Lahkawng lang ngu na Asak kaba sai, kaji kawoi ni a nhtoi hta shana shabra dat  sai. Asak kaba sai ni gaw, du na ten a matu myit mada shara nau n nga sai ni re, ngu nna mungkan masha ni mu mada ma ai.

Masha law malawng gaw asak kaba wa na grai hkrit tsang ma ai. Ana ahkya kap la na grai tsang ai majaw asak kaba sai ni hpe koi kau ma ai. Nkau mi gaw,  asak kaba sai ni gaw anhte hte hpa n seng ai, anhte yu lakawn na bungli n re, shanhte hpe yu lakawn ai rai yang, manghkang shalaw la ai sha re, nga nna myit la ma ai. Ndai myit masa gaw, “throw-away culture”  “n ra jang kabai kau na ngu ai myit masa” nan rai nga ai. Lachyum gaw matsan ai ni, n-gun kya machyi hkrum loi ai ni hte anhte nga mu nga mai ai ni gaw kaga ga sha re. Shanhte a mayak manghkang gaw anhte hte hpa n seng ai, ngu ai myit masa rai nga ai. Chyum laika hta, Asak galu ai ngu ai gaw chyeju langai mi re, nga nna she tsun da nga ai. Asak kaba sai ni gaw koi kau na, shinggan de tawn kau na masha ni n rai ma ai hta n-ga, shanhte gaw Karai Kasang a shaman chyeju hte mai kaja ai lam madun ai ni rai ma ai. Asak kaba sai masha nga ai nta gaw shaman chyeju lu ai. Asak kaba sai ni hpe hkungga chye ai nta gaw shaman chyeju lu ai nta rai nga ai.

Asak kaba ai prat hpe anhte aloi sha n chye madat lu ai. Tinang hkum nan hkrum yu ai shaloi sha lachyum chye madat nga ai. Asak kaba ai prat gaw, aten galu langai mi lai mat wa ai hpang byin wa ai prat rai nga ai. Asak kaba wa na hpe kadai mung tau nau n hkyen lajang da ma ai. Raitim asak kaba mat sayang she akajawng sha dum chye la lu ai rai nga ai. Anhte a shinggyim  hpawng gaw rawt galu kaba wa magang, asak kaba sai ni hpe hkungga manu shadan  garum madi shadaw na malap kau magang rai nga ma ai.  Asak kaba sai ni hpe yu gawn na hkam kaja dap hpe shagreng nga ma ai raitim, asak kaba wa ai prat hpe myit dik myit pyaw let shalai la lu na lamang hpa mung n lajang da ma ai. Dai lam a majaw du na ten hpe shalai la na myit lit li dum ma ai.

Grau myit ru hpa langai mi gaw tinang asak kaba wa sai kumla hpe makoi magap kau na matu hkum shan hpyi nyip wa ai myiman, lagaw lata ni hpe gumhpraw law law htum nna,                         ga-lajang, chywi lajang kau ai gaw grai li la ai lit langai mi rai nga ai. Asak kaba wa ai hpe makoi magap nna aten gang da lu ai raitim, jet ai apu asi gaw n lu jaw sai hpe dum ra ga ai.

Magam bungli hkring sa mat sai ni, asak kaba wa sai ni gaw, shanhte a n-gun atsam, ahkying aten ni hpe grai jai lang kau masai.  Shanhte hpe shagwi shadut nna, n mai shangun sai. Shanhte a n-gun lagaw ni gaw yawm mat wa sai. Maga mi de machyi makaw mung shang wa nga sai. Dai ten hta, sut masa lam, arawng sadang lam nhkring n sa shachyut nna shingjawng hkat nga ai mungkan ga gaw asak kaba sai ni hpe “ nanhte gaw hpa akyu n rawng sai ngu ai ningmu hpe” madaw madun ya nga ai.

Dai aten hta asak kaba wa sai ni hpe myit lawm hkum lawm kyu hpyi ya ra ai gaw,                (Psalm 71:9 ) “Ngai asak kaba ai ten hta, ngai hpe hkum kabai kau et, Nye a n-gun yawm mat wa ai ten hta  ngai hpe hkum jahti da et.” Ngu ai chyum mungga hte kyu hpyi ya ra ai. Ndai chyum mungga gaw lam mi hku tsun ga nga jang, Madu Karai Kasang gaw, anhte a asak aprat tsang shagu hta anhte hte rau nga nga ai. Anhte a kara, hpraw mat hkra, mi na n-gun lagaw gawng kya du hkra, Madu Karai Kasang a nsa wenyi ngai hta asak hkrung nga ai. N kaja ai agung alau ginshan yaw ai lam ni hpe matut ninghkap awng dang lu na atsam ngai hpe jaw da nga ai lachyum re. Dai gaw Karai Kasang a chyeju nan rai nga ai.  Madu hta kam shamyet ga ai rai yang, Madu hpe chyeju dum shakawn na lam galoi mung mu lu nga ai. Madu hta kam shamyet nga ga ai rai yang, asak kaba gawngkung wa ai ngu ai gaw shingra tara a majaw hkum hkrang gawng run wa ai sha rai nga ai. Kaja wa nga yang, asak galu hkra asak hkrung nga lu ai gaw chyeju kumhpa kaba nan rai nga ai.

Ndai lam ni a majaw, asak kaba wa nga ai ni, tinang a hkum hpe tutnawng makawp maga lanu lahku la ra ai. Galoi mung awng sharawng zet tsang ai hku nga shalai la ra ga ai. Wenyi lam hta mung Shani shagu akyu hpyi ai, Nawku daw jau ai magam hta shang lawm nna, Sacramentu  hkam la mai nga ai. Ja chyum mungga ni hpe hti sumru yu ai, Karai Kasang hte ngwi pyaw simsa let nga ai zawn, nta masha ni hte mung simsa let kanawn mazum ai. Grau nna kashu ni hte apyaw angawn rai woi nga ai hku nna chyeju hkam la lu nga ai. Bai nna makau grup-yin e nga ai, matsan jam jau hkrum ai ni, machyi makaw hkrum ai ni hpe mung kaji gajaw sha rai tim garum la mai nga ai.  Shani shagu ndai prat masa hku nga ai rai jang tinang chyu myit kaji garen na malai, nta masha hte makau grup-yin htingbu ni hpe kabu awng sharawng ai lam jaw ya nga ai. Shakawn kungdawn laika 52:10 hta, asak kaba sai ni gaw Madu Karai Kasang a nta hta tsit lali tsawm nga ai tsan lun hpun ni hte bung nga ai. Makau grup-yin htingbu ni a matu mung chyeju kumhpa tai ya lu nga ai. nga nna rawng nga ai.

Asak kaba wa ai prat hpe myit daw nna hkring mat na n mai nga ai, sadi dung kangka let hpawt ni hpa baw naw galaw na ngu ai hpe tau nau myit da ai prat she rai nga ai.  Asak kaba sai ni gaw, ya nnan kaba wa ai pan na ma ni hpe tsawra myit madun ya ai magam hpe laksan gun hpai nga ma ai. Gasat gala laja lana lam hpe shingjawng nga ai ndai prat hta, dai masa hpe ninghkap kau nna, si mani ai tsawra myit hte asak hkrung nga sa lu ai ni gaw asak kaba sai ni sha rai nga ai. Dai majaw Wa Sarabyin hku nna asak kaba sai ni shakut shaja nga ga, nga nna  n-gun jaw da nga ai.

Anhte a prat hta mungkan ga gaw, chyam dinglik yu hkrum ai ten rai nga ai. Sudan mungdan hta laja lana du daw sai hkaw hkrum ai. Dai Hpang ana zinli kaba hkrum ai.  Dai hpang mungkan law law hta majan byin wa ai.  Dai majan gaw ya aten Uropa dan de du shang wa nga sai. Masha law law si hkrum nga ai. Shinggyim masha yawng a shingbyi shara nta rai nga ai mungkan ga mung hten za ma wa sai.

Ndai mabyin ni hpe galai shai la lu na matu gaw, mai kaja ai de myit galai shai wa na ra ahkyak ai. Laknak n lang ai myit masin hte shinggyim masha yawng gaw kahpu kanau hkrai rai nga ai hpe hkap la chye ra ai. Kaji Kawoi tai ai ni gaw, shinggyim masha yawng kahpu kanau re ngu ai hpe aja awa shadum da ya na lit kaba nga ai. Kaji kawoi ni gaw shanhte prat tup kashu kasha ni hpe tsawra myit hte gawn lajang lai wa sai. Ya asak kaba sai ten hta shanhte gaw, si mani ai myit masa, shagrit shanem ai myit masa, pawn ba madi shadaw ai myit masa hte mungkan ga hpe matut pawn ba ra nga ai. Dai gaw mungkan ga hpe tinang ngam da ya lu ai chyeju khringhtawng rai nga ai. Ya aten hta majan a majaw hprawng hkawm nga ai ma kaji ni a matu myit dum akyu hpyi ya nga ga. Grau nna Ukraine, Afghanistan, Dingda Sudan, Myanmar mungdan ni a matu kyu hpyi ya ga. San Pra ai Yosep zawn matsan dum tsawra makawp maga chye ai ni tai nga ga.

Yak hkak jam jau hkrum ai buga na htawt wa ai ni hpe hkap tau la nna, simsa ai hte woi nga na gaw lit kaba nan rai nga ai. Anhte asak kaba sai ni galaw na bungli kaba gaw, akyu hpyi na, anhte a myit kraw kaw na pru ai ga hte kyu hpyi na, Chyum laika hta rawng ai Madu Karai Kasang a ga ni hte hkau chyap na aten rai nga sai. Anhte kam sham myit kaba hte akyu hpyi ai rai yang, machyi makaw hkrum ai ni hte rau myit hpawm let hpyi ai rai yang, masha ni a myit masin hpe galai shai ya lu nga ai. Anhte asak kaba sai ni gaw ra gadawn nga ai ni a matu akyu hpyi ya ai matsan dum lama ai myit garan jaw ya ai masha ni rai ra ga ai. Karai Kasang hpe tut nawng shakawn kungdawn ai ni rai ra ga ai.

Asak kaba sai kaji kawoi ni a poi nhtoi hpe nanhte a Jau ginwang shagu, dum nta mare lawk shagu hta galaw nna myit kaji garen nga ai kaji kawoi ni hpe kawan gatsan ya ga. Shanhte hpe sa du shakram ai, kumhpaw kumhpa jaw ya ai rai jang, shanhte myit n-gun lu nna asak hkrung nga ai prat hpe lachyum pru dum na ma ai. Tsawra matsan dum ai magam kaba mung rai nga ai.

Ya aten hta, myit kaji garen hkrum nga ai ni shalan shabran hkrum lu na matu, Majan gasat na matu tutnawng gunglau nga ai nat tsadan hpe dang kau lu na matu Nu Maria kaw garum akyu hpyi la ga.

Nanhte yawng a matu mung ngai akyu hpyi ya nga ai, ngai a matu mung akyu hpyi ya marit nga nna Wa Sarabyin Francis shana dat nga ai.

KAJI KAWOI NI HPYI NA AKYU HPYI GA

Madu Karai Kasang e, ngai hpe asak galu ai chyeju jaw ya ai majaw chyeju dum nngai.

Nang Madu kaw shamyet shanat nga ai ni hpe, awng dang mai kaja ai apu asi jaw ya rit.

Myitdaw myit hten ai lam, myit shut kam shut ai lam ni hpe mara dat ya rit.

Ngai a n-gun lagaw kya wa ai ten hta, ngai hpe hkum kau da et,

Du na ra ai ten ni hpe, myit mada kam hpa ai hte hkap la chye na garum ya rit.

Nang Madu shatsam da ai lit magam hpe shakawn kungdawn let hkap la lu na garum ya rit.

Ngai a kashu ni hte, ma kaji ni yawng hpe makawp maga lam shading ya lu na matu garum ya rit.

Wa Sarabyin Francis hte Nawku hpung ting hpe makawp maga ya rit.

Myit kaji garen tsinyam hkrum nga ai mungkan ga hpe hkye mawai la rit.

Anhte marai shagu ngwi pyaw simsa lam maga de sha hkawm sa na lam shading ya rit law.Amen.

 

——————————————————————————————————————————-

JI WOI NI A MATU KYU HPYI GA.

Htani htana prat shagu hpe up hkang nga ai Wa Karai e, Nang hpe shakawn kungdawn nga ga ai  law. Aten ladaw shagu hta Nang Madu kaw shingbyi n-gun la nga ga ai. Anhte nta masha shada aten ladaw shagu, shara shagu shada myit hkrum myit ra na garum ya rit. Anhte a dum nta gaw Karai Kasang hpe chye chyang tsawra ai lam sharin ya ai jawng rai u ga. Shinggyim masha a san seng ai tsawra myit, nta masha shada hkungga manu shadan ai myit ni hpe sharin ya rit. Naw kaji ai ma ni gaw, dum nta masha ni a madi shadaw pawn ba ai hpe hkam la lu mu ga. Asak kaba sai ni mung nta masha ni hkungga madi shadaw ai hpe hkam la lu mu ga. Kaji kawoi ni gaw, anhte a hkringhtawng npawt ginru rai nga ma ai hte Hkristan laikyang kasi madun ya ai ni rai ma ai. Shanhte a makam masham kasi ni tatut sakse hkam lai wa sai ni a matu chyeju dum ga ai.

Anhte a Ji Woi ni hpe makawp maga ya rit Wa e. Shanhte hpe myit masin hkum hkrang hkam kaja ngwi pyaw simsa ai lam jaw ya rit. Shanhte hpe ngwi pyaw hkam kaja asak galu na shaman ya rit. Shanhte asak kaba wa ai ten hta, dum nta masha ni-manang ni hte alum ala rai nga pyaw lu na garum ya rit. Mungkan ga na asak htum mat wa ai shani mung, sumsing mungdan hta Nang Madu hte htani htana hkrum zup lu na shaman ya rit, ngu nna anhte a Madu Yesu Hkristu a mying hta hpyi nem ga ai law. Amen.