Masha shagu hpe Karai Kasang shaga la ai gaw, Trinita Karai Kasang a galu kaba ai shawang tsawra myit rai nga ai. Dai gaw, mau hpa mungsung lam rai nna, laklai ai chyeju hte Shi shaman ya ai. Tsawra myit gaw, manu jahpu n jaw ra ai sha lu nhtawm, asan apan re ai myit hte hkap la nna kabu gara let sakse hkam ra ai. Madu Yesu tsun ai, “Ngai nang kaw tsap nna chyinghka akawk shaga nga nngai. Kadai raitim ngai shaga ai hpe na la ai hte chyinghka hpaw la ai rai yang, ngai shang nna, shi hte rau dung nhtawm ngai lu sha, sha na rai nga ai” (Shrn. 3:20). Karai Kasang a shaga la ai gaw kade wa mau hpa rai nna tsawm htap nga a hka!

Masha shagu hpe Karai Kasang shaga la ai gaw, Trinita Karai Kasang a chyeju kumhpa nan rai nga ai. Dai gaw, tinang a asak aprat hpe Karai Kasang jaw da sai hte maren, hkum hkum tsup tsup sak hkrung nga sa lu na matu rai nga ai. Shaga ai gaw Karai Kasang rai nna dai hpe htan ya ai wa gaw nang, ngai, rai nga ai.  Shaga ai lam hpe htan ya na matu shanglawt ahkaw ahkang hte chyeju mung lu la ga ai.  Sung ai hku myit yu jang, shaga la ai lam a ningpawt ninghpang madung gaw Karai Kasang rai nna Shi a chyeju galoi mung anhte hte rau anga nga ai.

Ndai Karai Kasang shaga la ai ngu ai English ga “Vocation” gaw, “Vocare” ngu ai Latin ga kaw nna pru wa ai rai nna, Karai Kasang a Mungga masa hte maren tsun yang, lachyum gaw, myit jahtoi shadum ya ai, shing n rai, kraw kata e shamu shamawt sa ai lam rai nna, Karai Kasang shaga ai hpe myit jahkut dawdan, hkap la nna ap nawng sa wa ai lam rai nga ai.

Karai Kasang shaga la ai lam madung gaw, san seng chyoi pra ai prat de masha yawng hkawm sa na matu rai nga ai. Vatican Zuhpawng II a sharin shaga ai lam hta, “mungkan masha yawng chyoi pra na matu shaga la hkrum ai gaw, Karai Kasang a tsawra myit hta kup tsup wa na matu, shaga la ai lam re,” ngu nna, aja awa sharin ya sai (LG 9).  “Tsaw ra ai myit rawng ai wa kadai rai timung, Karai Kasang kaw na shangai wa sai hte, Karai Kasang hpe chye chyang ai wa rai nga ai. Kaning rai nme law, Karai Kasang gaw tsawra myit rai nga ai” (1Yn.4:8). Kaja wa teng sha, Chyoi Pra ai Wenyi a chyeju atsam hte tsawra ai hta sak hkrung hkawm sa nga ai ni yawng gaw, san seng chyoi pra ai prat hta hkawm sa ai ni hkrai rai nga ga ai. Madu Yesu a kasi hte sharin shaga lam ni hpe madat la nna Chyoi Pra Wenyi a chyeju hte masha yawng hpe daw jau sakse hkam nna san seng chyoi pra ai prat de shang wa ra ai.

Author: Jau Lazing Tu San