Hpaw hpang ai

Ningbaw       :       Madu Karai Kasang e, ngai hpe madi shadaw ya e.

Shawa            :       Madu e, ngai hpe alawan garum shingtau la rit.

Ningbaw       :       Kawa, Kasha, Chyoi pra ai Wenyi kaw hkungga shakawn nga u ga.

Shawa            :       Shawng ningpawt na hte maren, ya mung htani htana hkungga shakawn nga u ga law.

 

Mahkawn mangoi

Shakawn kungdawn ga (Psalmody)

Rau tsun na (1) (Antiphon)

Du sa ladaw: Zi-un a shayi sha e, kabu awng sharawng u law.

Yerusalem a shayi sha e, kabu gara let jahtau nga u. Alleluia.

 

Messiah gaw Hkawhkam hte Hkinjawng rai nga ai

 Shakawn Kungdawn (110:1-5,7 )

Shi gaw Hkawhkam nan rai na ra ai majaw, Shi a hpyen mahkra Shi a npu e rai na ra ai.   (1Kor. 15:25)

Karai Kasang nye a madu hpe tsun wu ai gaw, “Na a gumlau ni hpe, na a lagaw kabye ai lahkum

ngai shatai ai du hkra, Nye a hkra maga e naw a dung nga u,” nga ai.

Karai Kasang gaw na a up hkang na sumdoi, Zi-un kaw nna jaw dat na ndai;

Nang gaw, nang hpe gumlau ai ni a ka-ang e a up nga u. Na a hpyen majan shani e, na a amyu masha ni gaw

Chyoi pra ai hte mawn sumli let, hkan nang mayu nga ma ai; Jahpawt manap jau  jau na numri zawn,

Na a brang ram ni nang kaw du na mara ai.

Madu dagam da ndai gaw; “Nang gaw Melhkizedek a hkringhtawng lam hte maren, Htani htana hkinjawng

rai nga ndai” Ngu ndai rai nna, myit bai kayin na n rai. Na a hkra maga e nga ai Madu gaw,

Shi a masin pawt ai nhtoi hta e, Hkawhkam ni hpe shanyawp kau na mu ai.

Lam makau e lwi ai hka shi hta na shi lu na ra ai: Dai majaw shi gaw baw sharawt na ru ai.

Kawa, Kasha, Chyoi pra ai Wenyi kaw hkungga shakawn nga u ga.

        Shawng npawt na hte maren, ya mung, htani hta na hkungga shakawn nga u ga law.

 

Rau tsun na (1) Antiphon)

Du sa ladaw: Zi-un a shayi sha e, kabu awng sharawng u law.

Yerusalem a shayi sha e, kabu gara let jahtau nga u. Alleluia.

Rau tsun na (2) (Antiphon)

Du sa ladaw : Anhte a hkaw hkam, Hkristu Madu gaw du sa na ra ai. Shi gaw, Yawhan (kashin Kamun) jahtau nna tsun ai Sagu kasha rai nga ai.

Isaraela gaw Egutu mung na lawt sai                                                                      Shakawn kungdawn (114:1-8)

Kadai mung, ndai mungkan ga hpe kau da sai wa gaw, Egutu mung kaw nna mung woi la ai hkrum sai.  (St.  Augustine)

Israela masha ni Egutu mung hta na, Yaku a dap gaw gari magra ga ai amyu hta na, pru wa ma ai shaloi e;

Yuda ginwang shi a chyoi pra ai shara, Israela mung shi a ninghtawn, tai ma ai.

Nammukdara gaw dai hpe mu nna hprawng wa ai. Yawdan hka mung, nhtang mat wa ai.

Bum ni gaw sagu la zawn, Kawng ni sagu kasha Zawn, shingtawt ma ai.

Nammukdara e, nang hpa majaw hprawng wa n ta?  Bum ni e, sagu la zawn, Kawng ni e, sagu kasha zawn,

Hpa rai shingtawt hkawm nga myit ta? Ginding aga e, dai Madu a man e, Yaku a Karai Kasang a man e, gari ashun nga u. Shi gaw lunghkrung hpe hka lawng, Nhpai lung hpe, hka hpaw shara shatai wu ai.

 Du sa ladaw: Anhte a hkaw hkam, Hkristu Madu gaw du sa na ra ai. Shi gaw, Yawhan (kashin Kamun) jahtau tsun ai Sagu kasha rai nga ai.

Du sa ladaw (Rau.3): Yu mu, shinggyim masha ni hpe shanhte galaw ai lai len hte maren, kumhpa shagrau na matu, gade nna yang Ngai du sa na ring ngai, nga nna Madu tsun ai.

(Canticle)  Shing ran lai ka 19:1-2,5-7

Alleluia. Hkye hkrang la ai lam, hpung shingkang hte hpung dagu gaw, anhte a Karai Kasang hte seng nga ai.   Shi a tara dara ai lam ni tengman ai hte dinghpring nga lu ai. Alleluia. Alleluia. Karai Kasang a shangun ma ni ngu ai, Shi hpe hkrit kamyin ai kaji kaba yawng hte e, anhte a Karai Kasang  hpe shakawn kungdawn mu. Alleluia.

Alleluia. Chyahtum chyalai n-gun rawng ai Madu, Anhte a Karai Kasang up nga ai.

Anhte kabu gara ai hte sharawng awng nga ga! Shi a hpung shingkang hpe shagrau nga ga. Alleluia.

Alleluia. Dai sagu kasha a hkungran poi du ra ai hte, Shi a num ningnan jan gaw Shi hkum hpe mawn sumli da nga ai. Alleluia.

Du sa ladaw: Yu mu, shinggyim masha ni hpe shanhte galaw ai lai len hte maren, kumhpa shagrau na matu, gade nna yang Ngai du sa na ring ngai, nga nna Madu tsun ai.

 

Chyum mungga                                                                                                                                  Hpilip 4: 4-5

                Dai Madu hta tut nawng e kabu gara nga mu; bai ngai tsun nngai, kabu gara nga mu. Masha yawng mayawng nanhte a sumnung ai myit hpe chye wa mu ga. Dai Madu gaw ni magang wa ra ai.

Shagrau aw law ga (Benedictus ant.)

S      : Madu e, na a ngang kang ai tsawra myit anhte hpe madun ya rit.

N     : Na a hkye hkrang la ai lam mung, anhte hpe jaw ya rit. (S)

N     : Kawa, Kasha, Chyoi pra ai wenyi kaw hkungga shakawn nga u ga. (S)

Shakawn mahkawn gadun (Short responsory)

Laban (1): Maria e, hkum hkrit et; nang Karai Kasang a man e myi man pa nit dai; yu u, nang na-um nasin rai wa nna shadang sha shangai na rin dai.

Nye myit masin dai Madu hpe shagrau li ai; Nye wenyi mung ngai hpe hkye la ai

Madu Karai Kasang hta kabu gara li ai; Shi a mayam jan a myit gyip ai hpe shi mada yu nu ai;

Yu u, ya kaw nna shu mashi shu masha prat dingsa, ngai hpe a lu ai, ngu na ma ni ai.

Atsam rawng ai wa gaw, ngai hpe galu kaba ai galaw ni ai; Shi a amying nsang chyoi pra lu ai;

Shi hpe hkrit kamyin ai ni a ntsa e, shu mashi shu masha du hkra, Shi a matsan dum ai myit a nga nga ai.

Shi a lahpum hte atsam pra di nu ai; Tinang kraw e maw ai hku hta gumrawng nga ai ni hpe,

shi shabra kau nu ai. Du magam ni hpe tingnyang na jahkrat kau nna, myit gyip ai ni hpe shagrau ya nu ai.

Kawsi hkrum ai ni hpe kaja ai hte jahkru shakat nna, Sut su ai ni hpe kaman dat dat nu ai.

Anhte a ji wa ni hpe tsun da sai hte maren, Abraham hte shi a kashu kasha ni hpe

Prat dingsa matsan dum ai lam dum nga na matu, Shi a shangun ma Israela hpe lanu lahku nu ai,

Kawa, Kasha, Chyoi pra ai Wenyi kaw hkungga shakawn nga u ga.

Shawng npawt na hte maren, ya mung, htani htana hkungga shakawn nga u ga law.

Shawa akyu hpyi ga (Intercessions)

Laban (1 & 3)

N     : Teng man ai, asak hte lam rai nga ai, Madu hpang de anhte akyu hpyi ga ai.

S      : Madu e, anhte hte rau a nga nga na matu sa rit.

N     : Lamu Kasa Gabriel gaw Chyoi pra Maria hpang de nang Madu du sa na lam shana ya sai. Tsaw htum ai Karai a Kasha e, na a mungdan lam hpe hkaw tsun dan na du sa rit. (S)

N     : Yawhan Baptista gaw, nang Madu du sa ai nhtoi hpe mu chye lu nna kabu gara nu ai. Na a hkye hkrang la ai lam anhte hpe jaw ya rit. (S)

N     : Simeon gaw Mungkan ga a nhtoi Madu hpe kam sham wu ai. Myit kaja rawng ai ni yawng hpe na a nhtoi jaw ya rit. (S)

N     : Sin langa ni jahpawt manap hpe ala nga ai hte maren, anhte mung nang hpe ala nga ga ai. Nang gaw si mat wa sai ni hpe asak nnan de bai jahkrung la na ninghtoi Madu rai nga nit dai. (S)

 

Madu a akyu hpyi ga

Hpang jahtum akyu hpyi ga (Concluding prayer)

Laban (1): Mahkra dang chye ai Wa Karai Kasang e, Madu Hkristu bai du sa ai shaloi, na a chyeju hte anhte hkam la lu sai mai kaja ai akyu ara a apu asi ni hpe lang let, nang hpe hkap tau lu na ahkang jaw ya rit. Anhte hpe San Pra ai ni a wuhpung hta hkap la nna Sumsing lamu mungdan de woi wa na matu, htani htana ahkrung nga nna up hkang nga ai, anhte a Madu Hkristu a marang e, hpyi nem nga ga ai.

Shaman ai ga:

Mahkra dang chye nna, hpung shingkang arawng sadang hte hpring nga ai Wa Karai Kasang gaw, anhte hpe matsan dum let, shut hpyit mara raw dat ya nna, htani htana asak de woi wa mi ga law.

S:    Amen.

N     :       Madu Karai Kasang Wa hpe shakawn kungdawn nga ga law.

S      :       Karai Kasang hpe chyeju dum nga ga ai.