July shata (31) ya

Loyola mare na San pra ai Ignatius

(Jau . 1491-1556)

Jesuit Jau hpung hpe de hpang da ai san pra ai Ignatius gaw 1491 ning hta Spain mung Loyola mare hta shangai wa sai. Shi gaw hpyen du tai na grai sharawng ai, raitim 1521 ning Pamplona mare hta byin  ai majan hta shi a lagaw sanat machyu hkra mat ai. Dai aten hta shi a asak 30 ning rai nga ai. Machyi mai wa ai shaloi , rau ai aten hta, hti na matu sumtsaw sumra laika buk ni hpyi  u ai. Raitim  shi ra ai laika buk langai mi pyi n mu tam ya ma ai. Shi a manang ni gaw sumtsaw sumra laika a malai, mu tam ai Yesu a labau hte sanpra ai ni a labau laika  ni jaw ya ma ai. Laika dai ni hti hkrup ai hpang,  ndai ni mung ngai hte maren shinggyim masha hkrai rai ma ai. Shanhte galaw lu ai hpe ngai hpa majaw nlu galaw na i” nga myit la ai. Dai aten kaw nna hkristu a hpyen ma tai na dawdan kau sai. Dai hpang Manresa mare na jau tai jawng de shang mat wa ai. Shi a makam masham mahkrum madup ni hte seng nna shi ka shalat da ai mying kaba ai laika buk ni gaw wenyi shaman shakyang ladat ngu ai ‘‘Spiritual Excercises” laika ni rai nga ai. Ndai laika buk hte seng nna Wa sarabyin Pius (11) gaw, ‘‘Wenyi hpe hkye hkrang la ai hkrum lu na matu matsun ya ai myit su hpaji rawng htum hte shawa wuhpung hkan shatup lu ai wenyi hte seng ai hkansa tara laika rai nga ai ” (The wisest and the most universal spiritual code for guiding the soul on the part of salvation)  nga nna shagrau da ya nga ai.

Ignatius gaw Palestine mung hte Roma mare de makam masham akyu hpyi bu hkawm sa sai. Fransik mung Palestine mung, de mung du sa sai. Dai hpang Paris mare jau tai jawng hta,  hpaji sharin la sai. Dai mare kaw, hpung magam gun hpung langai de hpang sai. Dai wuhpung hpe Wasarabyin Pawlu (3) gaw 1540  ning hta madi shadaw ya nna Jesuit jau hpung “Society of  Jesus” nga nna shamying  ya sai. Shanhte laja lana hkan shatup ai, Lashum ga baw gaw  “Ad Majorem Dei Gloriam’’ (Karai Kasang a hpung shingkang grau rawt jat wa na matu), ngu ai rai nga ai.

Jesuit Jau hpung  ni gaw wenyi lam, hpaji lam hpe, hpyen ladat zawn, tara ja ai hku hkan sa shatup ai masing  kaw npawt gaw de da ai hpung rai ma. Dai majaw, laika sharin jawng ni, matsan dum lama magam ni galaw ma ai. Maigan mungdan de sasana magam gun ai lam hta mying kaba ma ai.

San pra ai Ignatius gaw shi a prat tup Roma mare kaw sha nga lai wa sai. Roma mare kaw san pra ai Philip Neri hte grai hku hkau ai manang tai wa sai.  Hpung magma gun wuhpung nnan de nna n hkring n sa, shakut shaja nga yang, 1556  ning hta Karai Kasang woi la hkrum sai.

San pra ai Ignatius a poi hpe shaning shagu July shata 31 ya shani  myit dum hkungga shagrau nga ga ai. Anhte Myanmar mung hte mungkan shara shagu magam gun nga ai Jesuit Jau, Brother ni yawng hpe Karai Kasang shaman ya u ga law.