LU SHA GAM LADAW A MATU WA SARABYIN A MUNGGA (2020)

Madu karai kasang hte rai yang, myit masin hta shada matut mahkai na  galoi mung byin mai nga ai

2020 ning Lu sha gam ladaw a matu, Wa Sarabyin Francis mungga shana ai hta, kam sham ai hpung masha yawng gaw, Madu Yesu a Paska mungsung hpe, madung da sumru  yu let, mai kaja ai prat de gayin wa lu ai lam ndau shana dat sai.

Madu Yesu a Paska mungsung ngu ai gaw, Madu Yesu n ni nkri yubak hkam ai, si hkam ai, bai hkrung rawt ai lam rai nga ai. Ndai lam hpe sumru nna, myit malai lu, galai shai wa ra ai. Wa saranyin a Mungga, ga baw gaw, “Madu Yesu a malai anhte, akroi anoi hpyi nem ga ai: “Karai Kasang hte htingrai htingrat myit jahkrum ai lam galaw mu,” nga nna, San Pawlu Korintu masha ni kaw shagun dat ai laika 2 hta rawng ai Chyum Mungga hte la kap nna tsun shana ya sai.

Karai Kasang hte matut mahkai  na saw shaga ai

(Kerygma) ngu ai kabu gara ai shiga a npawt rudi hpe yu dat ai shaloi, tsawra ai myit a mungsung lam hpe mu lu nga ai. Dai gaw kaja wa teng ai, tatut byin ai lam re. Dai re majaw, anhte gaw, Karai Kasang hte myit lawm hkum lawm let matut mahkai hkrum shaga ra ai nga nna tsun da nga ai. (Christus Vivit, 117)  N dai mungga hpe kam ai ni kadai mung, nye prat hpe ngai madu ai , ngai ra ai hku ngai galaw lu ai, ngu ai lam hpe, ning hkap kau ra ai.

Ante a myi hpe Udang ntsa e jen noi hkrum nga ai Madu Yesu hpe mada azi yu mu. Madu Yesu a marang e hkye hkrang la hkrum lu hkra gayin wa marit. Madu Yesu a Paska poi gaw,  lai mat wa sai mabyin sha n re ai. Chyoipra ai Wenyi a atsam hte aten shagu byin nga ai lam re. Machyi makaw, ruyak jamjau, hkrum nga ai ni hpe mu shagu, nni nkri hkam ai Madu Yesu hpe hkrum ai ngu kam sham hkap la ra ai, nga nna Wa sara byin tsun shana sai.

Akyu hpyi ai lam gaw ahkyak ai

Lu sha gam ladaw hta akyu hpyi ai gaw, hkam la lu sai Karai Kasang a tsawra myit hpe bai htang jaw ai rai nna, grai ahkyak ai.  Akyu hpyi ai a marang e, anhte Karai Kasang hte tut nawng manoi nga ai. Madu Yesu a mungga hpe mung, tut nawng chye madat lu nna, bai htang na atsam lu la ga ai. Chyeju chye htang ai a marang e, Madu Yesu a tsawra matsan dum lama ai chyeju tut nawng hkam la lu nga ai, nga nna wa sara byin shadum ya sai. Wa  Karai Kasang gaw, anhte kade n gun kya tim, hkrat sum tim, galoi mung hkye  la na lam matut manoi tam nga ai. Kawa Karai Kasang hkye la mayu ai a majaw, shinggyim masha ni a li la ai mara lit hpe, Kasha Yesu hpe hpai shangun ai rai nga ai. Ndai lam hpe Wa Sarabyin Benedict XVI gaw, “ Karai Kasang gaw, shinggyim masha hpang de, gayin wa lu na matu, shi hkum hpe ningdang kau nu ai” nga nna (Deus caritas est,12)” hta ka da nga ai.

Grau kaja ai mungkan ga hpe gaw gap mu

Madu Yesu a Paska mung sung hpe anhte prat hta hkap la ga, ngu ai lachyum gaw, Majan a majaw ru yak jam jau hkrum nga ai ni, Kanu a hkri tung kaw sat kau hkrum ai ma ni kaw nna, asak kaba gawng kung n jin  n ngut mat sai ni, lam amyu myu hku nna zingri zingrat hkrum sha nga ai ni law law nga nga ai. Dai ni hpe kawn lajang garum shingtau la ai hta, nang byin mai hku shang lawm ai lam, tsawra matsan dum ai magam hta shang galaw lawm ai gaw, grau kaja ai mungkan ga hpe gaw gap ai rai nga ai.  Lai wa sai March shata hta Wa Sarabyin, ramma hpung sut du ni hte hkrum bawngban ai shaloi, shanhte a magam bungli hpe, grau tara rapra ai hte masha law law shang lawm lu ai sut masa lam galaw hpang wa na myit hkrum ma ai.

Wa sarabyin a mungga hpungdim dat hku nna, ndai Lusha gam ladaw, Karai Kasang hpe daw jau ai poi magam ni hta, anhte a myit masin chyinghka hpaw da nna, Karai Kasang anhte hte  htingrai htingrat mayu ai nsen hpe madat la ra ai. Anhte a myi gaw Madu Yesu a Paska munsung lam ni hpe azi yu nna, myit malai lu nhtawm, Madu Karai Kasang the, myit san tsawm ai hte hkrum shaga lu na matu Nu Maria a lata hku nna akyu hpyi ya sai.