27 August 2020         

NA  A  MATU  MUNG  

   Chyoipra ai masha tai lu na matu, Saradaw, Jau, “laksan Hpung magam gun hpung   (religious)” tai yang sha byin mai na re ngu sawn la yang, shut na re. Yu maya bungli galaw nga na malai, aten na na akyu hpyi shaja yang sha, chyoipra wa ai, ngu sawn la chye ga ai. Dai gaw n jaw ai. Anhte a sak hkrung prat hta hpu nau tsawra myit hpe shawng madung da ra ai. Anhte gara kaw mi nga tim, hpa mi galaw tim, Madu hpe sakse hkam nna, asak hkrung na ahkyak madung rai nga ai. Nang Hpung magam gun ai rai yang, ap nawng da ai na a prat hpe kabu gara rai, ap nawng nga u-ga; nang dinghku de ai rai yang, Nawku Hpung hpe Madu Yesu tsawra ai zawn, na a madu wa, madu jan hpe mung tsawra nna chyoipra nga u-ga. Nang bungli ja galaw sha ai wa rai yang, hpu nau wa a matu, atsam marai tup galaw daw nna chyoipra nga u-ga. Nang kaji kawoi, kanu kawa rai yang, Madu Yesu hpe hpang gara  nga ai, kashu kasha ni hpe, myit galu hte sharin shaman shakyang ya u-ga. Nang ahkang aya lu ai wa rai yang , tingkyeng myit hpe rap tawn kau nna,wuhpung a rawt jat lam hpe madung tawn galaw ya u-ga.

    Nang Kashin Kamun Sakramentu hkam la ai shaloi lu la ai chyeju hte, na a prat hta, sanseng sanpra ai apu asi hte pu tsawm nga u-ga. Nang hte seng ai yawng mayawng, Karai Kasang a man kaw asan sha rai u-ga; kaning re mabyin masa kaw nga ai raitim, Karai Kasang hpe mada yu nga u. Mabyin masa ni a majaw mau taw nga ai lam, myit ungang nga ai lam n byin u ga.  Chyoi Pra ai Wenyi a atsam hte rai yang byin mai ai hkrai rai nga ai. Chyoi Pra ai Wenyi a apu asi rai nga ai chyoipra ai chyeju hpe na a sak hkrung prat hta lu la na rai nga ai.(Gal. 5:22-23) Na a gawng kya ai lam hpe chyu sha myit chye ai gaw agung alau langai mi rai nga ai. Dai ten hta,Udang ntsa jen noi sat kau hkrum ai Hkristu Madu hpe mada yu nna,“ Madu e, ngai gaw mara lu ai wa  rai nga n ngai. Raitim  nang Madu ngai hpe kachyi mi sha pyi kaja wa hkra galaw ya lu ai hpe kam nga n ngai,” ngu nna akyu hpyi u. Nawku Hpung gaw sanseng chyoipra ai ; raitimung Nawku Hpung gaw mara lu ai masha ni rau jawm hpawng nga ai shara rai nga ai. Ndai rau jawm hpawng nga ai hta, nang hpe chyoipra wa hkra galaw ya lu ai rai nga ai. Karai Kasang gaw Nawku Hpung hpe chyoipra san seng ai chyeju law law jaw da ya nga ai. Dai chyeju ni gaw, Chyoipra ai Chyum Laika, Sakramentu chyeju kumla ni, chyoipra ai shara ni, arau sha jawm hpawng nna, asak hkrung nga ai wuhpung wuhpawng ni, sanpra ai masha ni the, jahkum shatsup da ya sai. Karai Kasang a tsawra myit hta na pru wa ai, “ja lungseng hte mawn sumli da ai num nnan zawn,” (Isa.61:10) tsawm htap ai lam yawng, Nawku Hpung hpe jaw da ya sai, shaman da ya sai.

   Karai Kasang nang hpe sanpra ai masha tai na ra sharawng ai majaw, dai bandung de   du lu na matu, kaji sha re ai bungli ni hte hpang wa ra ai. Ga shadawn: Gat de sa wa ai num langai mi, manang jan hte lam kaw hkrum ai.Shan gaw kaga jinghku jan a lam n kaja ai tsun maw nga ai shaloi, shi a myit kaw nna,”Ngai kade a lam mung n kaja ai n tsun na,”ngu dawdan kau ai. Ndai myit masa  gaw chyoipra wa na lam a lahkam langai rai sai. Num dai gat kaw nna nta de bai du ai shaloi, kasha ni gaw shan nau ni ra ai lam hkap tsun dan mayu ai. Shi gade pu ba timung, myit galu hte dung madat ya sai. Ndai mung chyoipra  ai lam a lahkam langai rai sai.    Mayak mahkak hte hkrum ai shaloi, Nu Maria hpe shi tsawra ai majaw Rosary hta la nna kamsham myit hte Rosary akyu hpyi ai. Ndai mung chyoipra masha tai na garum ya ai lahkam langai mi rai sai. Dai hpang lam ningmaw de pru sa wa ai shaloi matsan masha langai hte hkrum ai. Shi hpe matsan dum tsawra myit hte ga shaga ai. Ndai mung chyoipra masha tai lu na hkrun lam a lahkam langai rai sai.

                  Anhte a prat hta kalang lang dingbai dingna jaw ai hpan law law hte hkrum katut ga ai. Ndai dingbai dingna jaw ai lam ni kaw nna Madu garum la, hkye la na shaman chyeju ni hpe dum dat ai rai jang, “shi Madu a chyoipra ai madang de du lu shangun ai,”(Heb.12:10). Ga shadawn, yu maya amu ni hpe galoi mung galaw ai zawn, shawoi na myit hte sha galaw nga ai; raitim, Madu Karai Kasang a ngun atsam hpe myit dum dat nna, “shawoi galoi mung galaw nga ai kaji kajaw sha re bungli ni hpe “grau kaja hkra” myit jasat nnan hte galaw sa wa ra ai.” Vietnam mung na Cardinal Saradaw Kaba Francis Xavier Nguyen van Thuan, gaw shi hpe htawng  sharawng da ai shaloi, shi galoi lawt lu na kun, nga nna, myit nga na malai, htawng kata hta ganing re akyu rawng ai tsawra matsan dum ai bungli galaw lu na kun, ngu ai hpe sha, myit nga ai.  “Shani shagu ngai lu ai aten hpe kaji kajaw re bungli galaw nna, laklai akyu pru ai bungli byin hkra galaw na,” nga nna shi daw dan ai.

   Karai Kasang shi a garum chyeju hte anhte hpe galaw shangun mayu ai kaji kajaw re bungli ni hpe, amying shaprai galaw ai amu gun zawn n rai ai sha; “Karai Kasang a shaman chyeju law law hpe akyu jashawn la ai amu gun ni zawn,” galaw ra ai.( 1 Pet.4:10) “Anhte gawng kya ga ai; raitim bai hkrung rawt wa sai Madu Yesu a atsam kaba hte hkrung nga ga ai. Dai majaw anhte gaw tsawra ai bungli ni hpe ra n rawng hkra galaw lu ai,” nga nna New Zealand mung na Saradaw ni tsun ai ga gaw, grai jaw nga ai. “Madu a tsawra myit gaw jarit masat ai lam n nga ai; dawm la kau ai ngu n nga ai. Hka bai hpyi ai lam n nga ai; sadi dung ai tsawra myit rai nga ai.N-gun kya ai ni rai ga ai majaw, anhte tsawra ai amu bungli hpe hkan galaw na  n loi ai gaw teng nga ai.  Raitim, Hkristu zawn shakut nna tsawra ra ai; Shi a bai hkrung rawt ai asak anhte hpe jaw da ya sai hpe, dum ra ai. Madu hpe kasi yu la ga ai rai jang, shinggyim gawng kya ai lapran e Shi a hpung shingkang atsam hpe shapraw dan lu na rai ga ai law”.

Kabu hkinnun let aw law nga mu.

# Wa sara byin Francis #