AUGUST SHATA(15)YA

Nu Maria Sumsing Lamu de Woi Shalun La Hkrum ai poi

( Assumption )

Ginding aga asak htum ai hpang Nu Maria gaw sumsing lamu ja mungdan de hkum hkrang hte wenyi  nawng shalun la, shagrau ya hkrum ai nga nna kam sham ga ai.Ndai tengman ai lam hpe moi kaw nna sharin shaga hkrat wa sai; dai hpe Wa Sarabyin Pius ( 12 ) gaw shi a sharin shaga laika Buk : “Munificentissimus Deus” hta, makam masham zawn kam ai sharin shaga lam,“as a dogma of faith” nga nna 1950 ning hta masat shagrin shabra da ya sai.

Nu Maria hpe Ephesus mare kaw Kasa Yawhan e yu gawn nga ai hpe anhte hpang jahtum mu lu ga ai. Nawku Hpung gaw Nu Maria nsa hti ai, shing nrai yup pyaw mat ai, nga nna ginhka dan ai. Nu Maria a hkum hkrang gaw nhten nrun ai sha, shawa yawng bai hkrung rawt na nhtoi a shawng lam tai nna, lamu ja mungdan de shalun la hkrum ai re, nga nna kamsham ga ai. Nu Maria, Karai Kasang e alak mi rai shagrau ya ai laksan ahkaw ahkang lu ai wa rai nga ai.

“Assumption: Lamu de shalum la hkrum ai” sharin shaga lam gaw, Nawku Hpung matut manoi madi shadaw hkrat wa ai hte, shingran Laika e mung madi shadaw da ya ai.“Sumsing lamu kata e mau hpa amu kaba dan pru ai gaw: ajan lawai nna shata kabye ai hte, shagan shi lahkawng kap ai janmau gup tawn ai numsha langai mi dan pru ai.” nga nna mu hti lu nga ga ai.( shingran Laika 12:1 )

…………………………………………………………………………………………………………

Nawku Hpung gaw dai ni e San pra ai Athanasia hpe mung myit dum let shagrau nga ga ai; shi gaw tsa ban matsat hta Greece mung Aegina mare kaw shangai ai amyu shayi re. Hpyen du langai mi kaw num wa ai; raitim shan hkungran ai hpang 16 ya sha naw rai yang, madu wa gaw majan hta si mat ai, Shi num bai wa ai madu wa gaw makam masham kaba ai la rai nna, hpang de tawra tai mat ai. Athanasia gaw shi a nta hpe Ma Ma jawng shatai kau nna shi gaw tara shakut let nga mat ai. San Pra ai Athanasia gaw Hkawhkam jan, Empress Theodora a hpaji jaw ai sanpra ai amyu shayi mung rai nga ai.