Wan gam ladaw a matu Wa Sarabyin Francis a mungga: Mai kaja ai nli gat hkai mu.

2022  Wan gam ladaw a matu Wa Sarabyin Francis hpung masha ni hpe shana ai mungga hta, nanhte mai kaja ai hkaili gat hkai mu, shaloi nanhte hkum nan a matu mung masha ni a matu mung mai kaja ai nsi nai si lu la na ra ai nga nna tsun shana ya sai.

Wa Sarabyin Francis gaw shi a mungga hpe San Pawlu Galati masha ni hpe shagun da tai laika hpe madung da nna tsun shana ya sai. “ Kaja ai amu galaw na matu anhte nhkrit ntsang ga. Kaning rai n me law anhte n yaw ga yang gaw, aten ladaw du jang dan la na anhte ra ga ai. Dai re majaw, aten ladaw naw pra nga yang, anhte masha nlang hte hpe mai kaja ai amu galaw nga ga.” Galati 6:9-10

Karai Kasang hte magam gun ai ni (God’s co-workers)

Wa Sarabyin gaw nli hkai nna bai dan la ai masa hpe madi madun let, ndai Wan gam ladaw gaw anhte myit malai lu nna, anhte a myit jasat ni hpe galai shai kau ra ai aten rai nga ai nga nna tsun shadum sai. Shaloi anhte a prat hta tengman dinghpring ai, tsawm htap ai lam ni byin wa na ra ai. Dai gaw nga manga hpe madu la na malai, garan jaw chye ai lai kyang ni,  nga manga hpe lahkawn la kau na malai, mai kaja ai lam ni hpe hkai shabra garan jaw chye wa na rai nga ai.

Wa Sarabyin matut sanglang dan ai gaw, shawng ningnan e  anhte a shinggyim masha dinghku nta ni hta, “mai kaja ai lam hpe law law hkai dat u”. Ndai Wan gam ladaw hta, Madu a mungga hpe atsawm sha madat sumru ai hku nna, Karai Kasang a chyeju kumhpa hpe chyeju bai htang u. Shaloi Karai a munggga gaw “anhte a prat hta apu pu asi si wa na ra ai”. Ndai lam hku nna anhte gaw Karai Kasang a magam gun ni tai wa na ga ai. Dai gaw Karai Kasang a mai kaja ai chyeju hpe gam garan ya ai tai wa nga ai.

Nsi nai si shu la ai (Reaping the harvest)

Anhte a prat hta kaji dik ai mai kaja lam sha galaw dat ai raitim dai mai kaja ai lam gaw, Madu Yesu a nhtoi, manam pyaw ai sama hku nna mungkan ga de shachyam shabra ya ai. Ga shagawp laika hta rawng ai hte maren, “ marai mi hkai mat wa ai, marai mi gaw bai dan la ai” nga ai. Anhte nan hkai dat ai nli tum a apu asi hpe gaw anhte loi mi sha lu la na ga ai. Grau ahkyak ai gaw masha ni akyu lu na matu anhte mai kaja ai lam galaw ra ai. Dai a marang e anhte a tingkyeng myit hte anhte ra ai hku chyu sha galaw mayu ai myit hpe shamat kau ya ai. Gingdan ai lam n nga tim madu Krai Kasang a hkyikhkam tsawm hpap ai yaw shada lam de du shang wa nga ga ai.

Akyu hpyi ai, Wan gam ai, Tsawra matsan dum ai magam galaw ai. (Prayer, fasting, and charitable giving)

Wa Sarabyin gaw San Pawlu Galati masha ni hpe ka da tai kaika hpe la-kap nna, moi prat kaw nna Wan gam ladaw hta hkan lang hkrat wa ai lam ni rai nga ai akyu hpyi ai, Wan gam ai, shawang alu sak jaw ai lam ni galaw na matu shadum ya sai.  Akyu hpyi ai lam hta myit n daw ga. Anhte a prat hta Karai Kasang hpe ra ga ai, shinggyim masha ni hpe mung ra ga ai. Anhte a nhkru nkaja ai prat hpe ru kaw nna baw kau lu na matu myit n daw ga. Wan gam ai hku nna, anhte mara hpe gasat ninghkap na matu n-gun atsam jat wa ga ai. Mara raw ai Sacramentu hku nna, hkum hkrang ngang gayut ra marin ai mara hpe gasat kau lu ga ai. Anhte a makau grupyin htimbu ni hpe tsawra matsan dum ai magam galaw na myit n daw ga. Kaja wa ra gadawn nga ai ni hpe sharawng awng ai hte, kabu gara ai hte garum shingtau la ga.

Shaning shagu Wan gam ladaw hta mai kaja ai magam hpe, tsawra ai myit hte, tara rapra ai hte, myit hkum myit ra ai hte, galaw sa wa ga. N dai magam ni gaw, prat tup na matu kalang galaw yang ram sai ngu ai n rai nga ai. Shani shagu tatut galaw ra ai lam ni re, nga nna Wa Sarabyin tsun shana ya sai.

Mai kaja lam galaw na matu myit n ba ga. (Do not grow tired of doing good)

Anhte a myit masin ga namhpun hpe Wan gam ai hku nna gram lajang ya ai. Akyu hpyi ai hku nna hka jaw ya ai, tsawra matsan dum ai magam hku nna, bawng ring kaba wa shangun ai.  Wa Sarabyin kahtap nna bai tsun shana ai gaw, mai kaja ai lam hpe galaw na matu hkum ba mu, “Ngang grin ai kam sham myit rawng mu” Anhte myit ndaw ga ai rai yang, aten du jang anhte nsi nai si shu la lu na ga ai. Hkam sharang let myit galu ai hte nga sa ga yang, Madu Karai ga sadi jaw da ai hte maren shaman chyeju lu la na ga ai. Anhte hkye hkrang la hkrum ai sha n ga, masha ni mung hkye la hkrum na rai nga ai nga nna Wa Sarabyin Francis shadum matsun ya sai.