San Petru yan Pawlu gaw Kabu Gara Shiga hkaw tsun sakse hkam ai lam hta magrau grang ai, Nawku Hpung a kri shadaw (Pillars) lahkawng rai ma ai. Lahkawng yan a atsam marai ni gaw shanhte a n rai, Yesu Madu hte hkrum zup lu ai aten kaw nna lu la ai hte galai shai wa ai prat rai nga ai. Shan gaw Yesu a tsawra myit hpe hkrum katut la ai a marang e, shamai shatsai hkam la ai hte shalawt dat hkrum ai rai ma ai.

SAN PETRU

Petru gaw Galile mung na nga hkwi ai wa rai nga ai. Shi a n hkum tsup ai lam ni hte hkrat sum ai machyi kaba lam ni kaw nna lawt lu ai sha n-ga, Yesu Madu a dam lada ai tsawra myit kaba hpe lu la ai. Kungkyang ai nga hkwi la wa, shana tup nga hkwi ai raitim, nga n lu ai majaw myit htum ai aten ni mung shi hkrumkatut yu nu ai (Lk. 5:5; Yn. 21:5). N-gun lapyin ai hte myit lawan ai wa gaw hkrit kajawng chye ai (Mt.14:30). Yesu hpang hkan ai Kasa wa raitim, mungkan myit masa n hkoi hkraw ai majaw, Yesu tsun ai wudang a lachyum hpe n chye hkap la ai; shawng na daw hta hkrat sum ai wa rai nga ai. Shi a asak hpe nawng kau na matu jin jin rai nga ai nga nna tsun tim, Yesu hpe nyet kau ai (Mk. 14:66-72). Kaning re ai raitim, Yesu gaw Petru hpe tsawra ai, myit n daw na matu, sumgawn hpe hka de kalang mi bai jahkrat shangun ai. Shi a n-gun kya ai lam ni hpe hkap la shangun ai hte wudang hkrun lam hta hkawn sa na matu saw shaga ai. Ndai zawn Yesu gaw Petru hpe hkrit hpa lam kaw na shalawt dat ya ai hte mungkang myit masa kaw nna shlawt dat ya ai. Hkrit tsang lam kaw nna lawt lu nhtawm gwi ai myit masa hpe jaw ya ai. Makam masham hpe shangang shakang n-gun jaw na matu shi hpe Yesu shaga la ai. Sumsing mungdan a sumtzaw ni hpe mung shi a lata hta ap ya ai hte, dinghta ga e gyit da mada gaw sumsing lamu hta mung gyit da ai hkrum na ra ai, dinghta ga e raw maraw gaw sumsing lamu hta mung raw kau ai hkrum na ra ai lam shi hpe tsun da ai (Mt. 16:19).

SAN PAWLU

San Pawlu mung Yesu shalawt dat ai mahkrum madup law law hkam la nu ai. Shi gaw, dip lu dip sha hkrum ai mayan prat kaw nna lawt lu ai wa rai nga ai. Dai gaw, shi hkum nan shi mayam zawn hkrum sha ai hpe tsun mayu ai. Sawlu ngu ai mying kaw nna Pawlu ngu ai mying hpe lu la ai, de a lachyum gaw “Kaji ai” (Small) rai nga ai. Shi gaw, tara ja ai hte Yuda makam masham hpe hkan shadik ai hta madung tawn nna, Karai Kasang hte htingbu wa hpe tsawra ra ai tara hpe gaw hkan sa na yak dum wu ai. Karai Kasang gaw shi hpe dai zawn re ai lam ni kaw nna shalawt dat nhtawn, Kabu Gara Shiga hpe hkaw tsun sakse hkam nna asi law law si lu na matu sasana amu ap ya ai hkrum nu ai. Hkum hkrang hta machyi kaba hkrum ai, zingri zingrat amyu myu hkrum katut ai, kawsi hpang gara hkrum ai; shi hkum nan ning nga tsun ai, “Ngai a hkum shan hta ju ju ai hkrum nga nngai,” nga ai (Gal 4:13-14; 2Kor 12:7-10).

Dai majaw Pawlu tsun ai, “Karai Kasang gaw mungkan kaw na n-gun ja ai ni hpe gaya jahkrum nna, gawng kya ai ni hpe shaga la ai (1Kor 1:27), “Ngai hpe n-gun lagaw shaja ya ai wa a majaw, lam shagu hpe ngai hkamjan lu nngai (Phil 4:13); “Hkristu a tsawra ai hta na kadai wa mi jahka kau lu na ta?” (Rom. 8:35-39) nga ai. Dai majaw San Pawlu tsun gwi ai gaw, “ Nye a jaw e, dai hkaw dan ai ga hpe dan dan hkaw tsun lu nna, maigan amyu ni yawng na la lu hkra, dai Madu gaw ngai a maga de rau tsap nga ai; ngai hpe n-gun shaja ya ai hte hkanghkyi a n-gup kaw na mawoi la ai hkrum ni ai (2Tim 4:`17); nga, sakse hkam da ai. Pawlu mung shalai dat ai poi mahkrum madup: shalawt dat ai hkrum lu ai.

Tsawra ai hpu nau ni, Nawku Hpung ndai n-gun kaba rawng ai (Two giant) Kasa lahkawng gaw shalawt dat hkrum ai hte mungkan ga de Kabu Gara Shi-ga hkaw tsun shachyam shabra ai lam hpe mada yu ga. Shawng nnan e, Yesu hpe hkrum ai shani kaw nna shalawt dat hkrum ai lam rai nga ai. Yesu gaw shan hpe n jeyang ai sha, shan hte hku hkau ai, grai ni htep ai hku shan yan a prat hta shang lawm ai. Shi a kyu hpyi ya ai hku nna shan hpe garun shingtau ya ai. Petru hpe Yesu tsun ai, “Na a kamsham myit n hten u ga, ngu nna ngai na a matu akyu hpyi da ni ai (Lk.22:32). Pawlu hpe mung, “Sawlu Sawlu nang ngai hpe hpa rai zingri nga a ta? nga ai (Kasa 9:4). Anhte yawng a matu mung, Kawa hpang de akyu hpyi let ni htep ai hku Yesu nga nga ai; grau nna shi hpe kau da ai shaloi si mani ai hku anhte hpe garum ya nga ai. Shaloi anhte yawng n-gun atsam rawng nna, anhte a hkrun lam hta matut hkawm sa lu na ga ai.

San Petru yan Pawlu a poi nhtoi hta Wa Sarabyin Francis hkaw tsun ai maning na mungga hpe Jinghpaw hku ga gale da ai re.