AUGUST SHATA (4) YA

San Pra ai John Maria Vianney

(Jau : 1786-1859)

San Pra ai John Maria Vianney hpe “Jau ni laksan kam shamyet ai San Pra Masha’’ Patron of Priests, ngu nna masat shagrau ga ai. Shi gaw Fransik mung Dardilly kahtawng na, matsan ai kanu kawa yan kaw nna 1786 ning May shata 8 ya shani shangai wa ai. Asak 20 ning hta Lyons mare na Jau tai jawng de shang ai ; raitim “myit mang hpaji’’ Philosophy hte “ Karai Kasang a hpaji” Theology ni hpe shi nlu hkan ai ; grai yak dum nga ai.Jau tai jawng up shi hpe shapraw kau na tsun ai shaloi ginwang up Saradaw gaw : “ Nawku Hpung gaw hpaji kung zet ai jau ni hpe sha ra kadawn nga ai n re; chyoipra ai jau ni hpe grau ra kadawn nga ga ai.” nga nna bai htan ya ai.

1815 ning hta John Jau tai wa ai; shi hpe mare  masha 230 sha nga ai, grai tsan ai Ars mying ai nam kahtawng kaw ginwang up Jau lit shatsam ya ma ai. Shi hkum hpe grai jamjau jaw ai sha n-ga, shi kaw mara sa raw ai ni a mara malai mung, shi she jamjau hkam la la rai nga ai. Shi gaw masha  ni hpe mara raw ya ai shaloi , shanhte a wenyi kata na lam chye ya ai; masha wuhpung hpe chye gang zinlum ai shaman chyeju atsam ni lu ai. lani mi hta nayi hkum 14 mara raw ya ai; ngam ai aten hta ma ni hpe tara ga sharin ya nna, kaba ai ni hpe shanhte a shara kaw du hkra tara ga sa sharin ya ai.

Satan gaw 1824 ning kaw nna 30 ning tup , Wa Jau John hpe zingri shatsang ai. Satan gaw galang lang grai hkit na zawn nga ai nsen, galang lang gaw ndi nda rai hkrup mara shamu shamawt hkawm dan ai; galang lang gaw nta kata na arung arai ni wan hkru ai zawn re nsam hte masun jahkrit ya ai. “Cure of Ars”  Ars mare hpe shamai shatsai la ai wa , nga nna shamying hkrum ai. Wa Jau John gaw shi a manang Jau ni e mung “masha a nya , masu ai”  nga nna n kaw n law jahpoi ai hpe hkrum ai Kalang mi na shanhte Jau ni a wutsawk myit sumru kyu hpyi  galaw ai aten hta Jau langai mi gaw Jau John hpe “ Masha amad” ngu jahpoi ai. Dai hpe na kau ai shanhte a Saradaw gaw: “ Nye a Jau ni yawng mung shi zawn, loi sha pyi mana na hpe ngai ra sharawng ai .”( I wish that all my clergy had a small grain of the sam madness ) nga nna tsun ai. Jau John gaw shagrau shakawn shamying ai mying ni hpe n ra sharawng ai.

1852 ning hta Jau John hpe “ Monsignor ’’ ngu nna shagrau shamying ma ai. De a lachyum gaw kahtawlik Nawku Hpung kata kaw Hpung a matu alak mi rai shagrau ging ai Jau kaba ni hpe shagrau ya ai mying ,English ga hku “ My Lord” ngu ai ga hte maren rai nga ai. Shi hpe “ Monsignor” ngu nna shagrau ya ai mying hte hpawn, shagrau shalawm ya dat ai gawm hte sangkan hking hpe dut kau nna matsan masha ni hpe garum jaw kau ai. 1859 ning hta San Pra ai John Maria Vianney hpe Madu a ja mungdan de woi la sai. Dai ni na aten du hkra shi gaw Ginwang Up Jau (Jawng Dung Jau ) ni nlang a kasi kamang  kaja tai nna myit dum shagrau nga ga ai.

Nawku Hpung gaw dai ni e, Persia mung na amyu shayi ni hpe Nawku Hpung de woi jashawn la ai San Pra ai Ia (Ia) hpe mung myit dum shakawn nga ga ai. Shi gaw Grik amyu mayam num rai nga ai. Shi a makam masham n nyet ai majaw baw kahtam di kau ya  ai hkrum sai.