Shinggyim masha a prat madang hkrat sum ai hte  shinggyim hpawng htenza mat ai lam  

(24 Sept, 2020)

Anhte wa sarabyin Francis shadum da ai hta , shinggyim masha ni sut lu nga mai lam, prat madang rawt jat lam ladu lai  hkra shakut ai majaw, shinggyim hpawng hten za mat ai, matsan jam jau mat wa  ai nga nna tsun ai.

Anhte shinggyim masha ni hta akyang  langai nga ai dai gaw,  akyu naw rawng tim n ra jang, kabai kau ai,  ‘kabai kau ai’ “throw away”  ngu ai lai kyang  a majaw hkrat sum lai lam grai nga nga ai.

Karai Kasang hpan da ai magma galaw ai ten hta, shinggyim masha hte mungkan ga, hpan da ai rai ni yawng, ngwi pyaw simsa rapra ai hte sak hkrung hkawm sa na lajang da ya sai. Rai tim, dai ni na ten hta, arung arai ni hpe, naw mai lang tim n ra jang, kabai kau ai,  ‘kabai kau ai’ “throw away” lai kyang ni a majaw makau grup-yin hten za nga ai. Shinggyim masha ni a prat mung hkra machyi wa nga ai.  Ga shadawn, lung seng tawng langai lu na matu, bum kaba ni hpe htu galau kau ai. Nam maling hta, hpun kaba ni ra nna, hpun kaji ni hpe yawng kran shalawm kau ai. Malu masha nma ntsa shadu shajan nna, kabai ayai kau ai. Shat shadu, rai hkrut, hka shin ai shaloi, hka hpe ra ai hta jan nna lang  ai.Bu hpun palawng, hkyep din, jawng, nhpye, ni naw mai lang tim kabai kau ai.Lagaw leng, cycle, mawdaw ni, naw mai lang tim gabai jahten kau ai. Ndai akyang gaw, tinang hte masha ni hpe  hkra machyi shangun nga ai.

Jak rung rawt jat wa ai majaw makau grup yin nbung baza nna hkam kaja lam hkra wa nga ai. Mare kaba ni hta mawdaw, jak rung ni, wan hkut gung shapraw  dat ai majaw, grup-yin nbung maza nga ai. Htaw-wa htaw-sa madang nem ai the makau grup yin mung garu kachyi nga nga ai.  Mare kaba hta wutdek nta ladu lai gaw gap wa ai majaw san seng ai nbung, jan a shingkang nlu la ai majaw hkam kaja lam n nga wa ai. Tsit lali ai shara n nga ai daram rai nga ai. Dai gaw shing gyim masha ni a prat madang hkrat sum wa ai lam langai mi rai nga ai. Mare buga nkau hta, grai dam ai shara ni hpe madu langai mi sha tingkyeng madu  la kau nna, tsit tsawm hkra galaw da ai. Rai tim masha yawng n mai sa mat sai. Matsan ai ni nga ai shara gaw baza bala rai nga ra ai. Dai mung rapra tara ahkaw ahkang n lu ai rai nga ai.

Laudato si

Wa Sarabyin Francis