(Pru mat wa ai laika 23: 20-21 )  “Yu u, lam hkan e nang hpe bau sin nna, ngai mazing da ai shara de nang hpe woi wa na matu  na a shawng e lamu kasa ngai shangun dat se ai.   

  – Karai Kasang gaw shinggyim masha ni hpe makawp maga na matu lamu kasa ni hpe hpan da ya sai.  Anhte marai shagu hpe sin ai lamu kasa langai hpra yu makawp maga na matu jaw da ai. Sin ai lamu kasa ni a poi gaw shaning shagu Oct.2 ya shani rai nga ai.

Sin ai lamu kasa ni gaw, hkum hkrang n lu ai, wenyi rai ma ai. Shan hte a bungli gaw karai kasang hpe hkungga shakawn ai, Karai Kasang matsun ai hte maren, shinggyim masha ni hpe makawp maga lam matsun ya ai.  Shing gyim masha ni a matu kyu hpyi ya ai. Hkrit tsang lam ni kaw na makawp maga ya ai.  Mai kaja ai magma ni galaw lu na matu , myit kraw kata hta jahtoi ya ai.  N kaja ai lamu kasa ni hpe gaw Sadan ngu shamying ai.  (Shingran 12:7-9)

Lamu kasa n kau mi Karai Kasang hpe gumlau rawt nna, shanhte hpe jaw ai chyeju ni shamat kau nna, sadan tai mat wa ma ai.  Karai kasang gaw, sadi n dung ai lamu kasa ni hpe ngarai mung de gawt kau ma ai. N kaja ai lamu kasa ni a ningbaw wa gaw Lucifer rai nga ai. Shanhte gaw, shinggyim masha ni Karai Kasang hpe n tsawra lu hkra tut nawng gunglau ma ai.  Chyum laika hta, lamu kasa ni a mying hpe mu lu nga ai. Dai ni gaw, Michael, Gabriel, Raphael ni rai ma ai. Kaja ai lamu kasa ni a ningbaw gaw, Michael rai nna, karai kasang hpe gumlau rawt ai  lamu kasa ni hpe gasat jahten kau ai wa rai nga ai.  Shinggyim masha ni hpe makawp maga up hkang ai wa mung rai nga ai.                     (Kahtawlik  nawku hpung  a tara laika)