Wa sarabyin Benedik XVI ka lajang da ai.  “YOUCAT” Youth Catechism of the Catholic Church,  “ Kahtawlik ram ma ni a matu TARA LAIKA”

29 Sept, 20202

 (1)  Anhte shinggyim masha ni hpa majaw mungkan ga ntsa e nga nga ai kun?

Anhte shinggyim  masha ni gaw mungkan ga ntsa e nga yang, karai Kasang hpe chye chap na, shi hpe tsawra na, Shi myit ra ai hpe hkan galaw na, lani mi hta, sumsing mungdan hta shi hte rau htani htana ngwi pyaw lu na matu  anhte shinggyim masha hpe mungkan ga ntsa e hpan da ai rai nga ai. Shinggyim masha ngu ai lachyum gaw Karai Kasang kaw na sa wa nna, Karai Kasang hpang de bai wa na ngu ai lachyum re. Karai Kasang hpang de bai wa ai hkrun lam hta, Madu Yesu gaw manang tai ya ai. lam madun ya ai. Shi gaw anhte a “Lam rai nga ai. Tengman ai hte, asak mung rai nga ai.” (Yh. 14:6)

(2) Karai kasang hpa majaw anhte hpe hpan da a ta?

Anhte shinggyim masha ni gaw tsawra ai myit hpring  gabrat wa ai shaloi,  Shi a tsawra myit hpe kaga masha ni hpe garan jaw mayu nga ai.  Dai myit hpe Karai Kasang kaw na lu la ai rai nga ai. Karai Kasang mung shi a tsawra myit hpring chyat wa ai majaw shinggyim masha hpe hpan shalat dat sai. Shi a htum mat nchye ai tsawra myit hpe anhte hpe garan jaw mayu ai majaw hpan dat ai rai nga ai. Shinggyim masha ngu ai ni gaw, Karai Kasang a tsawra myit kaba a majaw hpan da hkrum ai ni rai ma ai.

(3) Shinggyim masha ni hpa majaw Karai Kasang hpe tam ma ai kun?

Karai Kasang gaw anhte a salum hta shi shanu nga na matu shara langai mi san da nu ai. Dai shara hta Karai Kasang hpe n lu bang da dingsa anhte myit masin gaw, gahtet gamawt nga nna, simsa lam nnga  lu ai. Dai majaw Sanpra ai Augustine tsun ai gaw,  “ Nang gaw anhte hpe, na a matu hpan da  sai majaw, Nang hta sha n shingbyi lu dingsa, anhte a masin salum gaw, zim na n rai nga ai.” nga da ai. Ndai zawn Karai Kasang hpe ra sharawng ai, tam ai hpe “Makam Masham” ngu ai rai nga ai. Karai Kasang hpe shinggyim masha ni sawk sagawn, tam bram nga ai gaw, ra nan ra ai mabyin rai nga ai. Tengman ai, simsa ai hpe masha yawng tam nga ma ai. Shinggyim masha gaw tengman simsa ai lam a madu rai nga ai Karai Kasang hpe n tam mu dingsa, shi myit ndik nga ai.

YOUCAT

Wa sarabyin   Benedict  XVI