Tsawra ai ngai shu ngai sha ni,

Kasa Mathe, Marku Luka ni ka da ai chyum mungga hta, Madu Yesu Hkrang n sam galai   wa ai lam tsun da nga ai. Madu Yesu gaw shi a sape ni, shi hpe nchye madat ai ten law law nga ai majaw chye madat kam sham wa na matu shadan dan ai rai nga ai. Kasa Petru gaw “Nang gaw Karai a kasha Yesu hkristu nan rai nga n dai” nga nna tsun shapraw ai hpang, gade n-na yang Madu Yesu hpraw nsam galai shadan dan ai rai nga ai. Kasa Petru gaw madu Yesu n ni nkri yu bak hkam na, Udang hpai nna jen noi si hkrum na nga ai hpe na jang, grai n-na ra ai, n byin u ga nga nna tsun ai. Shaloi, Madu Yesu gaw, “Satan e nye hpang de sit mat wa u, nang gaw nye matu ahtu kataw shara re” nga nna tsun dat ai. Nang gaw Karai Kasang myit ai hku n myit ai. Shinggyim masha myit ai hku sha myit ndai ngu nna tsun ai. (Mt 16:23) Dai hpang kru ya na jang, Madu Yesu gaw Petru, Yaku, Yawhan ni hpe shaga nna, tsaw ai Tabaw bum de woi lung wa ai. (Mt17:1)

Madu Yesu n sam galai ai chyum mungga daw hpe shaning shagu Lusha gam ladaw laban 2 hta hti sumru ga ai. Anhte yawng hpe mung, lusha gam ladaw laman hta, bum n tsa de, asan sha re shara de shaga mat wa nga ai. Anhte shani shagu galaw nga ai magam bungli ni, bungli galaw ai shara ni kaw nna, kaga asan re shara de, ndai lu sha gam ladaw hta, woi lung wa nga ai. Dai bum ntsa hta, wenyi lam shakut na, Madu Karai Kasang hte hkrum zup na matu rai nga ai.

            Lusha gam ladaw hta, myit malai tawngban ai lam, n galaw n mai rai nga ai. Dai galaw ai marang e chyeju ni hkam la lu ai. Kam sham myit jat la lu ai. U dang hpai ai, n-ni n-kri yu bak hkam ai lam ni hpe Madu Yesu hte rau, galaw nga ga ai. Ndai chyeju ni hpe san Petru hte kaga kasa ni mung ra kadawn ma ai. Hkam jan lu ai chyeju lu la yang sha Madu Yesu hpe grau chye madat wa na, Hkye hkrang la ai mungsung gasung hpe chye madat lu na, shi madu hta, myit masin hkumhkrang ap nawng nna hkan sa lu na rai nga ai.  Mungkan a hten bya chye ai arawng aya, tang pyaw lam ni hpe di kau da lu na rai nga ai. Madu Yesu a hpang hkan ai hkrun lam gadawng hta, mung, atsam dat hkawm sa ai, ap nawng hkam sharang ai, myit machyu jung ai, atsam ni lu la na ga ai. Ndai atsam ningja ni gaw, (Synodal Church) Rau jawm hpawm hkawm sa ai nawku hpung kata hta mung ra ahkyak nga ai. Lusha gam ladaw hte Rau jawm hpawm hkawm sa ai nawku hpung hkrun lam hpe myit sumru yu ai marang e hkam la lu ai chye ju law law nga nga ai.

Madu Yesu gaw Tabaw bum ntsa de Sape ni marai 3 hpe woi lung wa ai. Bum ntsa de du ai shaloi, Madu Yesu hpraw n sam galai ai hpe mu lu ma ai. Sape ni gaw dai mabyin hpe tatut hkam sha mu lu ai sakse ni tai wa masai. Dai lam hpe sakse hkam shana shabra na matu shaga la hkrum ai ni rai ma ai. Bum ntsa de mung Madu Yesu hte arau sha lung wa nna Madu Yesu a hpung shingkang hpe shanhte rau sha mu lu ma ai, maren sha re mahkrum madup hpe arau sha hkrum katut ma ai. Dai hte maren Nawku hpung akyu hpyi nawku daw jau ai aten hta mung, Madu Yesu hte rau, Madu Yesu masat ya ai masha ni hte rau hkrun lam hkawm sa ai rai nga ga ai.

Sape ni hte rau Tabaw bum de lung wa ai lam, Madu Yesu sumsing lamu de lung wa ai lam, mahkrum madup ni gaw, (Synodal Church ) Rau jawm hpawm hkawm sa ai nawku hpung hte bung nga ai. Hpa majaw nga yang Ningbaw rai nga ai Madu Yesu a hpang e hkan nang hkawm sa ai majaw re. Madu Yesu gaw anhte hkan nang na ningbaw majing rai nga ai.

Madu Yesu a myiman htoi tu wa nna shi a hpun palawng ni hpraw tu nga ai nga nna Chyum laika hta tsun da ai. (Mt 17:2) Dai gaw tsaw dik ai bandung kaw du sai rai nga ai. Dai mahkrum madup ngut ai hpang, sape masum gaw, Madu Yesu hte rau bum pungding kaw naw tsap nga ma ai. Shanhte gaw laklai ai shaman chyeju ahkaw ahkang   lu la ai ni rai ma ai. Dai mau hpa chyeju gaw Madu Yesu hta lai nna, kaga kadai kaw na mung n sa wa lu ai. Dai hpung shingkang gaw kadai hte mung shadawn nlu ai, kaba dik ai hpung shingkang rai nga ai. Madu Yesu a hpung shingkang gaw Sape ni galaw shakut ai bungli hta, htam law law kaba nga ai.

Dai re majaw bum ntsa de lung wa ai hkrun lam, bum ntsa hta byin ai mahkrum madup ni yawng gaw kaba dik hkyik hkam dik ai, chyeju ni rai nga ai.

Anhte Rau jawm hpawm hkawm sa ai nawku hpung hta shawa hte rau hkawm sa ai shaloi gaw, myit daw myit kaji ai lam nga na re. Hpang jahtum e mau hpa chyeju ni lu la na rai nga ai.  Shaloi Madu Yesu a Hkye hkrang la ai mungsung ga sung lam ni hpe grau chye wa na ra ai.

Tabaw bum ntsa e Madu Yesu nsam galai nga ai ten hta, Myi Htoi Eliah hte Moshe mung dan pru wa ai. Dai a lachyum gaw  Mihtoi ni hte shanhte sharin masat da ya ai tara ni hpe Madu Yesu gaw hkungga shagrin ya ai, jasan jaseng ya ai ngu ai lachyum rai nga ai. (Mt 17:3) Madu Yesu a prat  hta mung, moi na ga shaka dingsa hte Madu karai kasang n dat da ya ai lam ni hpe matut manoi hkan sa nga ai lam madun ya nga ai.  Ga shaka ding sa na mabyin ni gaw Madu Yesu a prat hte n mai ginhka kau ai, shada matut mahkai nga ai hpe madun ya nga ai. Dai hte maren Rau jawm hpawm hkawm sa ai nawku hpung gaw lai sai ten na htung hkying mahkrum madup ni hta ru jung matut mahkai nga ai. Mai kaja ai de galai shai na matu myit masin chyinghka hpaw da nga ai. Lai wa ai ten na htunghkying mabyin masa ni gaw, ndai prat na nawku hpung hta byin wa chye ai agung alau ni, jahten shaza lam ni,  shut kataw wa ai lam ni hpe koi yen kau lu na matu garum ya ai. Mai kaja  akyu rawng ai ladat ningnan hpe mung jaw ya lu nga ai.

Lusha gam ai myit malai lu ai aten ladaw hte  Rau jawm hpawm hkawm sa ai nawku hpung ni gaw bandung langai sha rai nga ai. Dai gaw Madu Yesu hpraw n sam galai ai kaw nna Madu Yesu si ai ni kaw nna bai hkrung rawt ai Paska mungsung chyeju ni hpe lu la nga ai. Dai ning 2023 ning madu Yesu Hpraw n sam galai ai poi gaw, laklai ai shaning rai nga ai ngu tsun mayu ai. Lam lahkawng hpe sumru shangun mayu ai.

 1) Tabaw bum ntsa de du lu na matu, Madu Yesu hte rau myit mang langai sha hkawm sa ra ai. Shi Madu hte rai yang, bandung de hkrak sha du lu na re.

2)  Tabaw bum ntsa kaw madu Yesu ahpraw n sam galai ai hpe mu ngut ai hpang, ndai lam kadai hpe mung ntsun na matu kasa ni hpe hkang da ai. Lamu ntsa  samwi kata kaw nna nsen ngoi pru wa ai. “Ndai wa gaw ngai tsawra ai ngai a kasha rai nga ai. Shi hpe madat mara mu” nga nna tsun ai. (Mt 17:5)  Karai Kasang a numhtet ga hta ahkyak ai gaw Madu Yesu hpe madat mara mu nga ai re. Lusha gam ladaw gaw Madu Yesu sharin matsun ai hpe madat mara na aten rai nga ai. Gara hku sharin nga a ta ?

1) Nawku hpung kaw nna Nawku daw jau ai lamang hta hkaw tsun ai karai a mungga hpe madat mara ra ai.  Karai Kasang a mungga madat la ai shaloi na n na ai ni zawn n mai shalai kau ai. Lama wa Missa hkungga n lu sa jang internet kaw na chyum mungga hti sum ru mai ai nga nna Wa sarabyin shadum da nga ai. Dai hta n ga anhte a makau grup yin e nga ai masha ni hku nna mung shaga nga ai. Grau nna, matsan mayen nlu n lawm ai ni hku nna mung shaga nga ai. Nawku hpung hta hkrun lam rau hkawm sa ai ngu ai hta, ru yak jam jau hkrum nga ai ni, hpe yu lakawn ai lam mung grai ahkyak nga ai. Madu Yesu hpe madat mara ai nga jang Nawku hpung masha shada madat mara na mung ahkyak ai. Ndai zawn shada madat mara ai lam gaw Nawku hpung kata myit hkrum myitra let hkrun lam rau hkawm nga ai lam rai nga ai.

Sumsing lamu de na Kawa Karai Kasang a nsen na jang Sape ni gaw grai hkrit kajawng nna gum dagup ma ai. Shaloi Madu Yesu gaw shanhte hpang sa wa nna sa kahtawk let, nanhte hkum hkrit mi, rawt u. ngu nna tsun jang kasa ni gaw madu Yesu hpe baw sharawt mada yu ai shaloi Yesu chyu sha tsap nga ai hpe mu ma ai. (Mt 17:6-8)

2) Shani shagu na prat hkrun lam hta, tatut shakut shaja ra ai lam law nga ai, ding bai dingna jaw ai lam nga nga ai. Dai ni hpe hkrit nna koi yen mayu ai majaw lak lai ai lamik kumla tam chye nga ai. Ladu lai laklai ai lamik kumla ni hpe hkum kam u. Madu Yesu madun dat ai htoi tu kabrim ai hpung shing kang gaw, Madu Yesu bai hkrung rawt ai, Paska poi hpe tau nau nna madun dat ai rai nga ai. Anhte marai shagu gaw, Madu Yesu hte sha, rau hkawm ga ai rai yang, Madu Yesu a hpraw n sam galai ai hpe mu lu ai ahkaw ahkang lu na ga ai. Dai gaw bandung du sai rai nga ai.

Lusha gam ladaw gaw Paska poi de sa wa ai hkrun lam rai nga ai.  Dai hkrun lam hta, Madu Yesu n ni n kri yubak hkam ai lam ni, Udang hpai nna jen noi si hkam ai lam ni hpe sumru ra ai. Dai hpang Kam sham, tsawra myit mada ai myit hte Madu Yesu hkrung rawt   ai poi de shang lawm ra ai.

Anhte Rau jawm hpawm hkawm sa ai hkrun lam hta mung, Karai kasang gaw anhte hpe atsam kaba ai mahkrum madup ni bai madun ya na rai nga ai. Anhte yawng hpe mung “Rawt u hkum hkrit u” nga nna Madu Yesu tsun nga ai. Pa layang ga de yu wa saga, yu maya magam bungli ni, mahkrum madup ni hpe hkap la nna, Rau jawm hpawm hkawm sa ai Nawku hpung masha ninghkring ni tai hkra shakut hkawm sa ga, nga nna Madu Yesu tsun nga ai.

Hkungga tsawra ai hpunau ni e, ndai lusha gam ladaw hta chyoi pra ai wenyi myit jahtoi lam matsun ya ai marang e  Madu Yesu a hpung shingkang arawng sadang hkam la nna, prat hkrun lam hta hkam jan lu ai  chyeju ni lu la u ga. Madu Yesu hte rau hkawm sa ai marang e shinggyim masha ni yawng hpung shingkang n htoi lu la u ga nga nna Wa sarabyin Francis tsun shana lai wa sai

Ndai mungga hpe Wa Sarabyin Francis gaw 2023 ning January 25 ya shani, San Pawlu  myit malai lu ai masat nhtoi shani, Roma mare kasa Yawhan Lateran nawku jawng kaba hta mungga htawn shana lai wa sai..

Wa Sarabyin Francis

Rome, Saint John Lateran, 25 January, Feast of the Conversion of Saint Paul

FRANCIS

• Press Conference to present the Holy Father Francis’ Message for Lent 2023
• Audience with the participants in the General Chapter of the Congregation of Marian Fathers of the Immaculate Conception of the Most Blessed Virgin Mary
• Audience with a group of Mexican businesspeople
• Audiences
• Resignations and Appointments